दुबईमा एकैदिन २२ नेपालीमा कोरोना पुष्टि

न्यूज ब्यूरो, एजेन्सी । युएईको शारहजामा एकै दिन २२ नेपाली कामदारहरुमा कोरोना भाइरस (कोभिड १९) को संक्रमण भेटिएको छ ।

शारहजाको एक क्लिनिङ कम्पनीमा एकैदिनमा ६१ जना महिला कामदारहरुमा कोभिड १९ पोजिटिभ देखिएको थियो । पोजिटिभ हुनेमा २२ जना नेपाली महिला कामदारहरु रहेका छन् ।

संक्रमित हुनेहरुलाई कम्पनीले आफ्नै क्वारेन्टाइन बनाएर अलग राखेको एनआरएनए युएईको क्युआरएफ टिम नेपालका संयोजक पासाङ शेर्पाले जानकारी दिए । तर क्वारेन्टाइनमा अलग्गै बाथरुम र शौचालय नभएकोले संक्रमण नभएका अन्य कामदारहरु समस्या रहेको शेर्पाले बताए ।

उक्त कम्पनीमा सयको हाराहारीमा नेपाली महिला कामदारहरु कार्यरत छन् । उनीहरु स्कुल, कलेज, बैंक, विभिन्न अफिसहरुमा हाउस किपिङको काम गर्छन् ।

स्कुल, कलेजमा काम गर्नेहरु बेतलबी बिदामा छन् भने बैंक तथा अन्य प्रतिष्ठानहरुमा काम गर्नेहरु नियमित ड्युटी गरिरहेका छन् ।