किसानका पीडा बुझ्न सांसद साह कमला बगरमा

न्यूज ब्यूरो, सिरहा । विश्वभर महामारीको रुपमा फैलिएको कोरोना भाइरस (कोभिड १९) संक्रमण रोकथाम तथा नियन्त्रणका लागि नेपाल सरकारले जारी गरेको लकडाउनका कारण जनजीवन पूर्ण रुपले प्रभावित छ ।

लकडाउनका कारण व्यवसायिक रुपमा खेती किसानीमै निर्भर किसानहरु यतिबेला थप बढी मारमा परेका छन् । किसानले अत्यधिक क्षति व्यहोर्नु परिरहेको बखत प्रदेश २ का सांसद दिलीप साहले किसानको समस्या बुझ्न खेतखेतमै पुगेका छन् ।

सांसद साहले सिरहा र धनुषाको सिमानामा रहेको कमला नदीको बगरमा गरिएको फलफुल र तरकारी खेतिको अनुगमन गरेका हुन् । किसानका पीडा बुझ्दै उनले संघीय सरकार, प्रदेश २ सरकार लगायत सम्बन्धित सबै निकायसँग समयमै बजार व्यवस्थापन र क्षतिको हिसाबले राहत उपलब्ध गरिदिन माग गरेका छन् ।

लकडाउनका कारण किसानको लाखौंको लागत समेत डुब्ने खतरामा रहेको भन्दै सरकारले किसानको लागि लागि सोच्न ढिला गर्न नहुने बताए । सिरहा जिल्लाका कमला नदीसँग जोडिएका विभिन्न नगरपालिकाका किसानहरु कमलाको बगरमा विभिन्न प्रकारका फलफुल तथा तरकारी खेति गर्दै आएका छन् ।

कर्जन्हा, कल्याणपुर, सिरहा नगरपालिका लगायतका स्थानका किसानहरु हजारौं बिगहामा लगाएका तरबुज र तरकारी बजार जानुपर्ने बेलामा पनि बजार ब्यबस्थापन नभएर खेतमै कुहिने अवस्था सृजना भएको छ । यहाँ उत्पादित तारबुजा, काँक्रों, करेला लगायतका तरकारी काठमाडौं र इटहरीसम्म पुग्ने गरेको थियो ।

तर, यसपटक लकडाउनका कारण तरकारी खपत नहुँदा अथाह मेहनत र लाखौं लगानी खेतमै नष्ट हुन थालेको छ ।