मिर्चैयामा सिमेन्टमा कालोबजारी गर्ने एक पक्राउ, पसल सिल

न्यूज ब्यूरो, सिरहा । सिरहाको मिर्चैयामा सिमन्टमा कालोबजारी गर्ने एकजना पक्राउ परेका छन् ।

मिर्चैयास्थित भाग्य विधाता आइरण स्टोरका सञ्जालक राजकुमार मगर पक्राउ परेका हुन् । बजारको मूल्य भन्दा बढि रकममा सिमेन्ट बिक्रि गर्दै गरेको अवस्थामा मंगलबार मगरलाई प्रहरीले पक्राउ गरेको हो ।

प्रहरीले पसलबाट प्रति बोरा ८ सयका दरले बिक्री भएको १० बोरा मारुति सिमेन्टसमेत नियन्त्रणमा लिएको छ । बिक्री गरी गाडीमा लोड भइरहेको सिमेन्ट नियन्त्रणमा लिएर पसलमा ताल्चा लगाई सिल गरिएको ईलाका प्रहरी कार्यालय मिर्चैयाका डिएसपी सन्तुप्रसाद जैसवारले जानकारी दिए ।

पक्राउ परेका मगरलाई जिल्ला प्रशासन कार्यालयमा बुझाइएको र थप अनुसन्धान भइरहेको जिल्ला प्रहरी कार्यालय सिरहाका प्रवक्ता तथा डिएसपी बिनोद घिमिरेले बताए ।