जनकपुरः राहत लिन जाँदा कानको जाली फुटाइदिए !

न्यूज ब्यूरो, जनकपुरधाम । जनकपुरमा आज एक व्यक्ति राहत लिन जाँदा कुटपिट गर्दै कानको जाली फुटाइदिएको आरोप लगाइएको छ ।

लकडाउनको कारण विपन्न, गरिब तथा ज्यालादारी मजदुरहरु स्थानीय सरकारले वितरण गर्न थालेको खाद्यान्न सामग्री लिन पुगेका एक व्यक्तिलाई प्रहरीले निर्घात कुटपिट गरी कानको जाली फुटाइदिएको आरोप लगाइएको पत्रकार किरण कर्णले समाचार लेखेका छन् ।

जनकपुरधाम उपमहानगरपालिकाका वडा नम्बर–४ मा वितरण गर्दै आएको राहत लिन पुगेका भारतको विहार निवासी सुजित साहले प्रहरीले आफूमाथि कुटपीट गरेको आरोप लगाएका छन् ।

जनकपुरधाममा लामो समयदेखि ठेला चलाएर आफ्नो गुजारा गर्दै आएका साहलाई लकडाउनले समस्या परेकाले उनी पनि राहत सामग्री लिन तिरहुतीय गाछी आइपुगेका थिए । त्यहाँ प्रहरीले भिड नियन्त्रण गर्ने क्रममा उनीमाथि एक्कासी आएर लाठी प्रहार गरेको थियो ।

प्रहरीले लाठी चार्ज गर्दा आफ्नो टाउको र कानमा चोट लागेर रगताम्य भएको र कानको जाली फुटेर सुन्न सक्ने क्षमता नै गुमाएको उनले जानकारी दिए ।

प्रहरीको लाठी चार्जबाट बेहोस भएपछि प्रहरीले नै उनलाई पाण्डे मेडिकल पुरयाएको थियो भने सामान्य उपचार पछि औषधी दिएर पठाएको पीडित साहले जानकारी दिएको पत्रकार कर्णले समाचार लेखेका छन् ।