विश्वभर कोरोना : मृतकको संख्या २ लाख नजिक, २८ लाखबढी संक्रमित

न्यूज ब्यूरो, एजेन्सी । विश्वभर कोरोना भाइरस (कोभिड १९) संक्रमणबाट ज्यान गुमाउनेको संख्या दुई लाख नजिक पुगेको छ ।

यसको संक्रमणबाट गएको २४ घन्टामा मात्रै विश्वभर ६ हजार ६४ जनाले ज्यान गुमाएका छन् । यो सँगै कोरोना संक्रमणबाट मृत्यु हुनेको संख्या १ लाख ९७ हजार २ सय ४५ पुगेको वल्र्डओमिटरले जनाएको छ ।

अहिलेसम्म विश्वभर कोरोना संक्रमितको संख्या २८ लाख ३० हजार ३८ पुगेको छ । शुक्रबार मात्रै १ लाख ३ हजार ६ सय ७८ जना नयाँ संक्रमित थपिएका छन् ।

संक्रमितमध्ये सात लाख ९७ हजार २ सय ४५ जना उपचारपछि निको भएका छन् । गएको २४ घन्टामा सबैभन्दा बढी अमेरिकामा १८ सय ५८ जनाको कोरोना संक्रमणबाट मृत्यु भएको छ ।

यो सँगै अमेरिकामा कोरोना संक्रमणको कारण ज्यान गुमाउनेको संख्या ५२ हजार ९२ पुगेको छ । अमेरिकामा अहिलेसम्म ९ लाख २३ हजार ६ सय १२ जना संक्रमित भएका छन् ।