जनकपुरः मजदुरको लास गाडने दुई जना पक्राउ

न्यूज ब्यूरो, जनकपुरधाम । मजदुरको लास (शव) गाडने दुई जनालाई जिल्ला प्रहरी कार्यालय धनुषाले पक्राउ गरेको छ ।

धनुषाको विदेहनगरपालिका स्थित सँचालनमा रहेको एक ईटा भट्टामा काम गर्ने मजदुरको करेन्ट लागेर मृत्यू भएपछि भट्टा परिसरमै गाडेको आरोपमा पक्राउ गरिएको हो ।

इँटाभट्टामा करेन्ट लागेर मृत्यु भएका एक जना मजदुरको शव गाडेको आरोपमा इँटाभट्टाका दुई जना सञ्चालकलाई पक्राउ गरिएको छ ।

पक्राउ पर्नेमा धनुषाका विदेह नगरपालिका वडा नं ३ को जोगियामा रहेको भगवती इँटाभट्टा सञ्चालक अनिफ नदाफ र अजिम मन्सुरी रहेका छन् ।

जिल्ला प्रहरी कार्यालय धनुषाका प्रवक्ता रामेश्वर कार्कीका अनुसार सो भट्टाका मजदुर सुक्ता नदाफको करेन्ट लागेर मृत्यु भएपछि सञ्चालकले नदाफको शव प्रहरीलाई कुनै जनकारी नगराई इँटाभट्टा परिसरमा नै गाडेका थिए ।

४० वर्षीय नदाफको सोमबार साँझ भट्टामा बिजुलीको तार जोड्ने क्रममा करेन्ट लागेर मृत्यु भएको बताइएको छ ।

नदाफको शव परीक्षणका लागि प्रादेशिक अस्पताल जनकपुरधाममा ल्याइएको छ भने पक्राउ गरिएका सञ्चालकहरुको अनुसन्धान अगाडि बढाइएको जनाइएको छ ।