लकडाउन टेरेन एबी मल, अझै खुल्लै

न्यूज ब्यूरो, सिरहा । विश्वव्यापी रुपमा फैलिएको कोरोना भाइरस (कोभिड १९) को संक्रमण नियन्त्रण गर्न नेपालमा सरकारले लकडाउन गरेको छ ।

नेपालमा समेत कोरोना संक्रमित भेटिएपछि सरकार थप कडाईका साथ रोकथामका कार्यमा लागेको छ । लकडाउनमा सरकारले भीडभाड नगर्न तथा अत्यावश्यक कामबाहेक नागरिकलाई घर बाहिरसमेत ननिस्कन भनेको छ ।

लकडाउन गरेको दिनदेखि नै भिडभाड नगर्न सरकारले नियमित सूचना प्रवाह गरिरहेको छ । यो कार्यको नेतृत्व स्थानीय सरकारले नै गरिरहेको छ । तर पनि सरकारको निर्देशनको अवज्ञा व्यापक देखिएको छ ।

कतिपय बुझेरै अवज्ञा गरिरहेका छन् भने कसैले लकडाउनबारे बुझेकै छैनन् । सिरहाको गोलबजारमा रहेको एबी मल लकडाउनमा पनि बन्द भएको छैन । सरकारको निर्देशनलाई लत्याउँदै दैनिक रुपमा अव्यवस्थित ढंगले मल सञ्चालन भइरहेको छ ।

मल सञ्चालनमै रहँदा उपभोक्ताहरु पनि मानेका छैनन् । दैनिक जसो त्यहाँ भीडभाड हुने क्रम राकिएको छैन । मल सञ्चालन गर्दा कोभिड–१९ को संक्रमणबाट जोगिन अपनाउनुपर्ने कुनै सावधानी पनि अपनाइएको छैन ।

दैनिक रुपमा मल सञ्चालन भइरहँदा पनि नगरपालिकाले भने कुनै चाँसो देखाएको छैन । ‘राजनीतिक र पावरको आडमा लकडाउनमा पनि दैनिक मल सञ्चालन भइरहेको छ, भीडभाड रोकिएको छैन’, स्थानीय अरविन्द मण्डलले भने, ‘यसमाथि प्रशासन र नगरपालिकाले अबिलम्ब सोच्नुपर्छ ।’