कोरोना संक्रमित बेलायती प्रधानमन्त्री जोन्सन अस्पताल भर्ना

न्यूज ब्यूरो, एजेन्सी । कोरोना भाइरसको संक्रमण भएका बेलायती प्रधानमन्त्री बोरिस जोन्सन अस्पताल भर्ना भएका छन् ।

१० दिनअघि कोरोना संक्रमण पुष्टि भएका बेलायती प्रधानमन्त्री जोन्सन ज्वरोलगायत यसका लक्षण कम नभएपछि अस्पताल भर्ना भएका हुन् । बेलायती सञ्चारमाध्यमका अनुसार उनी पुनः स्वास्थ्य परीक्षणका लागि आइतबार राति लन्डनस्थित अस्पताल भर्ना भएका हुन् ।

कोरोना भाइरसको संक्रमण देखिएको १० दिन बितिसक्दा पनि प्रधानमन्त्रीलाई लक्षणहरू निरन्तर उस्तै देखिएकोले यो कदम सावधानीका रूपमा चालिएको विज्ञप्तिमा उल्लेख गरिएको छ ।