भारतमा धार्मिकसभा जमात विवादमा गोली चल्यो

न्यूज ब्यूरो, एजेन्सी । भारतमा कोरोना भाइरसबारे विवाद हुँदा एक युवकको गोली हानी हत्या गरिएको छ ।

उत्तर प्रदेशको प्रयागराज जिल्लाको करेली इलाकामा उनलाई गोली हानेर हत्या गरिएको हो । गोली हान्ने युवालाई स्थानीयले पक्राउ गरेर प्रहरीलाई बुझाएका छन् ।

चिया पसलमा पत्रिका पढ्दा दिल्लीको धार्मिक सभा तबलीग जमातको विषयमा विवाद भएको थियो । विवादकै बीचका बहस गरिरहेका एक युवकले अर्को युवकलाई गोली हानेका थिए ।

प्रत्यक्षदर्शीका अनुसार लोटन निषाद र मोहम्मद सोनाका बीचमा गोली चल्नेसम्मको विवाद भएको हो । मोहम्मद सोनाले लोटन निषादमाथि गोली प्रहार गरेका हुन् ।

प्रयागराज जोनका प्रहरी महानिरीक्षक केपी सिंहले चिया पसलमा दुई जनाका बीचमा भएको सामान्य विवादमा गोली चलेको र अनुसन्धानका लागि नियन्त्रणमा लिइएको बताए । दुई युवाको बीचमा सामान्य वादविवादबाट सुरु भएको थियो ।

यो घटनापछि त्यहाँ भारी मात्रामा प्रहरी परिचालन गरिएको छ । मुख्यमन्त्री योगी आदित्यनाथले घटनामा संलग्नलाई कडा कारवाही गर्न निर्देशन दिएका छन् । मुख्यमन्त्रीले मृतकका परिवारलाई पाँच लाख आर्थिक सहायता गर्ने घोषणा पनि गरेका छन् ।