भारतमा कोरोना संक्रमणबाट मर्नेको संख्या ८० पुग्यो

न्यूज ब्यूरो, भारत । भारतमा कोराना भाइरस संक्रमणका कारण मृत्यु हुनेको संख्या ८० पुगेको छ ।

भारतका विभिन्न ठाउँमा शुक्रबार ८ जनाको मृत्यु भएसँगै कोरोनाबाट मर्नेको संख्या ८० पुगेको हो । शुक्रबार महाराष्ट्रमा ६ जनाको मृत्यु भएको छ ।

योसहित महाराष्ट्रमा मर्नेको संख्या २६ पुगेको छ । त्यस्तै शुक्रबार नै आन्ध्र प्रदेशमा ५५ वर्षीय एक पुरुषको संक्रमणका कारण मृत्यु भएको जनाएको छ । आन्ध्र प्रदेशमा कोरोना संक्रमणका कारण मृत्यु भएको यो पहिलो घटना हो ।

त्यस्तै आजै गुजरातको गोधरामा ७८ वर्षीय एक व्यक्तिको मृत्यु भएको जनाइएको छ । योसहित गुजरातमा मर्नेको संख्या ९ पुगेको छ । संक्रमणबाट बिहीबार भारतमा १० जनाको मृत्यु भएको थियो ।

भारतमा अहिलेसम्म कोरोनाबाट संक्रमितको संख्या २ हजार ५४७ पुगेको त्यहाँको स्वास्थ्य मन्त्रालयले जनाएको छ ।