विश्वभर कोरोनाबाट मृत्यु हुनेको संख्या ५३ हजार नाघ्यो, १० लाखबढी संक्रमित

न्यूज ब्यूरो, एजेन्सी । विश्वभर महामारीको रुपमा फैलिएको कोरोना भाइरस (कोभिड–१९) संक्रमितको संख्या १० लाख नाघेको छ ।

कोरोनाबाट संक्रमितको संख्या दशलाख १५ हजार ८ सय ७७ पुगेको हो । यसबाट ज्यान गुमाउनेको संख्या भने ५३ हजार २ सय १८ पुगेको छ ।

विश्वभर उपचारपछि २ लाख १२ हजार ९ सय ९२ कोरोना मुक्त भएका छन् । अमेरिकामा सबैभन्दा धेरै २ लाख ४३ हजार ४ सय ५३ जनामा संक्रमण पुष्टि भएको छ ।

यसैगरी इटालीमा १ लाख १५ हजार २ सय ४२ र स्पेनमा १ लाख १२ हजार ६५ जना संक्रमित छन् । जर्मनीमा संक्रमितको संख्या ८४ हजार ७ सय ९४ छ ।

मृतकको संख्या भने इटलीमा सबैभन्दा धेरै छ । इटलीमा कोरोना भाइरसको संक्रमणबाट १३ हजार ९ सय १५ जनाको मृत्यु भएको छ ।

स्पेनमा १० हजार ३ सय ४८ र फ्रान्समा ५ हजार ३ सय ८७ जनाको मृत्यु भएको छ ।