सप्तरीमा सशस्त्र प्रहरीले कुटपिट गरेको भिडियो भाइरल, कारवाहीको तयारी

न्यूज ब्यूरो, जनकपुरधाम । सामाजिक सञ्जालमा यत्तिबेला एउटा भिडियो भाइरल भइरहेको छ, जसमा सुरक्षाकर्मीद्धारा दुईजना सर्वसाधारण निर्घात कुटिएका देखिन्छन् ।

यो घटना सप्तरीको बलान बिहुल गाउँपालिकास्थित बलान नदीको हो । लकडाउन उल्लंघन गरेको आरोपमा सशस्त्र प्रहरी बलले दुईजना सर्वसाधारणमाथि निर्घात कुटपिट गरेका हुन् ।

सशस्त्र प्रहरीले आइतबार घरायसी समान र औषधि किनेर घर फर्किरहेका बलान बिहुल–३ मौवाहाका हरेकृष्ण साह र चन्द्र यादवलाई निर्घात कुटेको हो । कुटपिट गर्ने कर्मचारी सशस्त्र प्रहरी बल नेपाल बोर्डर आउट पोष्ट रामनगर कोदरकट्टीबाट खटिएका थिए ।

निर्घात कुटपिटबाट घाइते दुबैको स्थानीय स्वास्थ्य चौकीमा उपचार भइरहेको जनाइएको छ । भिडियोमा दुबैलाई भुइँमा घोप्टो पारेर निर्मम तरिकाले कुटपिट गरेको प्रष्ट देखिन्छ । नेपालको कानूनअनुसार सर्वसाधारणलाई प्रहरीले त्यसरी दुर्व्यवहार गर्न मिल्दैन ।

हेर्नुस् भिडियो :

सर्वसाधारणलाई निर्मम कुटपिट गरिएको भिडियो सामाजिक सञ्जाल फेसबुकमा सार्वजनिक भएपछि कुट्ने सशस्त्र प्रहरीको चर्को आलोचना भइरहेको छ । मधेशमा अर्कै व्यवहार र काठमाडौं तिर अर्कै व्यवहार भनेर सामाजिक सञ्जालमा चर्को आलोचना भएको देखिएको छ ।

सशस्त्र प्रहरीले सर्वसाधारण कुटेको उक्त भिडियो १९ घण्टामै झण्डै साढे पाँच लाखबढी पटक हेरिएको छ । यता, घटना बाहिरिएपपछि सशस्त्र प्रहरी बल, नेपालको मुख्यालयले संलग्नलाई कारवाही गर्ने तयारी गरेको छ ।

मुख्यालयले घटना सम्बन्धमा अनुसन्धान सुरु गरेको हो ।