भारतमा जनतालाई तीन महिनासम्म निःशुल्क खाद्यान्न

न्यूज ब्यूरो, भारत । भारत सरकारले ८० करोड नागरिकलाई तीन महिनासम्म खाद्यान्न सामाग्री दिने भएको छ ।

विश्वभर महामारीको रुपमा फैलिँदै गएको कोरोना भाइरसबाट संक्रमित हुनेको संख्या भारतमा समेत बढ्दै गएपछि सरकारले लकडाउन लागू गरेको छ । लकडाउन रहुञ्जेल निःशुल्क चामल, गहुँ र दाल सर्वसाधारणलाई सरकारले दिनेछ ।

पाँच किलो चामल वा गहुँमध्ये एक र एक किलो दाल तीन महिनासम्म निःशुल्क दिने भारतले घोषणा गरेको हो । यस्तै, भारतले कोराना भाइरसको उपचारमा संलग्नलाई ५० लाख रुपैयाँको बिमाको घोषणा गरेको छ ।

त्यसैगरी, भारतले ८ करोड ६९ लाख किसानका लागि अप्रिल पहिलो हप्ता दुई हजार रुपैयाँ दिने भएको छ । प्रधानमन्त्री गरीब कल्याण योजना अन्तर्गत भारतले यस्तो घोषणा गरेको भारतीय सञ्चारमाध्यमले जनाएका छन् ।