जनकपुरः कोरोनाको महामारीमा माक्स र सेनिटाइजर कालोबजारी गर्ने ४ पक्राउ

न्यूज ब्यूरो, जनकपुरधाम । कोरोनाको महामारीमै माक्स र सेनिटाइजरको कालोबजारी गर्ने ४ जनालाई धनुषा प्रहरीले पक्राउ गरेको छ ।

जिल्ला प्रशासन कार्यालय धनुषा र जिल्ला प्रहरी कार्यालय धनुषाबाट खटि गएको अनुगमन टोलीले जनकपुरको विभिन्न ठाउँबाट ४ जनालाई पक्राउ गरेको हो ।

सो क्रममा गत ५ गते जनकपुरधाम उपमहानगरपालिका वडा नं. ४ स्थित रहेको सुस्मिता मेडिकलबाट सँजय साहलाई पक्राउ गरिएको हो । माक्सको कलोबजारी गरिरहेको अवस्थामा पक्राउ गरिएको जनाइएको छ ।

यस्तै, गत चैत्त ७ गते शुक्रबार जनकपुरधाम उपमहानगरपालिका वडा नं. ८ भ्रमरपुरा चोकबाट समेत २ जनालाई पक्राउ गरिएको हो । त्यहाँ रहेको अटल मेडिकल फार्मेसीबाट धनुषाको लक्ष्मीनियाँ गाउँपालिका वडा नं. ३ बस्ने अन्दाजी बर्ष २६ का अनिल यादव र महोत्तरीको जलेश्वर नपा वडा नं. ६ बस्ने वर्ष २० का प्रभन्स चौधरीलाई पक्राउ गरिएको हो ।

माक्स र सेनिटाइजर कालोबजारी गरिरहेको भन्दै उनीहरुलाई पसलबाटै पक्राउ गरिएको हो ।

सोही क्रममा आज (शनिबार) समेत अनुगमनलाई तीव्रता दिँदै प्रजिअ कोषहरि निरौलाको टिमले जनकपुर ४ स्थित रहेको सम्पूर्ण मेडिकलबाट माक्स कालोबजारी गरेको आरोपमा बर्ष ३२ का सँजय साहलाई पक्राउ गरिएको हो ।

विश्व महामारीको रुपमा रहेको कोरोनाको सँक्रमणमा पनि कालोबजारी गरेको भन्दै पक्राउ गरिएको हो । जनतालाई सहज रुपले माक्स र अति आवश्यक वस्तुको पहुँच बनाउन सरकार आदेश जारी गरेको छ ।