धनुषाबाट २ नाका मात्र खुल्ला : सिडिओ निरौला

न्यूज ब्यूरो, जनकपुरधाम । धनुषाका प्रमुख जिल्ला अधिकारी कोषहरी निरौलाले धनुषाको दुई नाका मात्र खुल्ला रहेको बताउनुभएको छ ।

शनिबार बेलुकी न्यूज ब्यूरोसँग कुराकानी गर्दै प्रमुख जिल्ला अधिकारी निरौलाले कोरोनाको सँक्रमणलाई रोक्न भारतबाट नेपाल आवतजावतको लागि दुई नाका मात्र खुल्ला गरिएको बताउनुभयो ।

उहाँले धनुषा जिल्लाको विभिन्न नाकाहरुलाई बन्द गरी मुख्य व्यापारीक नाका मानिने जटही नाका र खजुरी नाका मात्र खुल्ला गरिएको जनाईको छ ।

जटही नाका र खजुरी नाकामा चिकित्सकहरुको विशेष टोली सहित कोरोना सम्बन्धी सहायता कक्ष राखेर दुईटा नाकाबाट आम नागरिकलाई आवत जावत गर्न दिने बताउनुभएको छ ।

सरकारले अघोषित रुपमा कलडाउन गरेपछि भोलीदेखि हवाई उडान समेत बन्द गर्ने भएको छ भने पर्सी सोमबारदेखि लामो दुरीका यातायात समेत बन्द गर्ने निर्णय गरेको हो ।

छिमेकी राष्ट्र भारतबाट नेपाल प्रवेश गर्ने आम सर्वसाधारणलाई विशेष चेकजाँचपछि मात्र छिर्न दिने व्यवस्था मिलाइएको जनाइएको छ । भारतमा समेत कोरोनाको सँक्रमण फैलिँदै गएको छ ।

धनुषामा अहिलेसम्म कोरोनाको सँक्रमण नदेखिएको भन्दै प्रजिअ निरौलाले सावधानी अपनाउन आम नागरिकमा आग्रह गर्नुभएको छ ।