काठमाडौंमा उखु किसान, 'सरकारले न्यायको लोभ दिएर अन्याय गर्यो'

न्यूज ब्यूरो, काठमाडौं । सरकारको आश्वासनपछि आन्दोलन छोडेर घर फर्केका उखु किसान फेरी काठमाडौं पुगेका छन् ।

सरकारसँग भएको सम्झौता पालना नभएपछि झण्डै एकसय उखु किसानहरु फेरी काठमाडौं गएका हुन् । उनीहरुले यही चैत ४ गतेदेखि आन्दोलनको घोषणा गरेका थिए ।

तर, कोरोना भाइरस संक्रमणको त्रासका कारण सरकारले भीडभाड नगर्नु भन्ने निर्देशन जारी गरिपछि उखु किसानहरु सार्वजनिक ठाउँमा आन्दोलन थालेका छैनन् । सरकारले सबैलाई घरभित्र बस्न आग्रह गरेपनि उखु किसानहरु घरभित्र बसेर के खाने भन्ने चिन्ताले पुनः काठमाडौं जान बाध्य बनेका हुन् ।

उखु किसान रामविलास महतो भन्छन्, ‘हाम्रो आम्दानी नै उखु हो । गत वर्षको पूरै भुक्तानी हामीले लिन बाँकी छ । विगतको पनि केही मात्रामा हामीले भुक्तानी लिन बाँकी छ । यो वर्षको त कुरै छोडौं । हाम्रो जीविका कसरी चलाउने योबारे सरकार चिन्तित नै छैन ।’

उद्योगीहरु बदमास भएपनि सरकारले समेत दायित्व पूरा नगरेको उखु किसान रामविलास महतोले गुनासो पाखे । पुसमा आन्दोलन किसानहरु आन्दोलनमा आउँदा सरकारले उद्योगीबाट बक्यौता रकम जसरी पनि फागुनसम्म उठाइदिने प्रतिबद्धता जाहेर गरेको थियो । तर, अहिलेसम्म उनीहरुले पाएका छैनन् ।

सरकारलाई गुहार लगाउन काठमाडौं आएका उनीहरु भन्छन्, ‘अहिले साथमा पैसा समेत छैन । त्यसमाथि विश्व महामारी (कोभिड १९) को कारण सरकारले घरभित्रै बस्न सतर्क गराएको छ । तर, के खाएर बस्नु ? सरकारले आफूहरुलाई न्यायको लोभमा अन्यायमा पार्यो ।’

उद्योग वणिज्य तथा आपूर्ति मन्त्रालयको तथ्यांकअनुसार एभरेष्ट सुगर मिलले ८ करोड रुपैयाँ भुक्तानी दिन बाँकी छ । बक्यौता रहेका उद्योगहरुमा महालक्ष्मी सुगर्सको १० करोड रुपैयाँ छ । अन्नपूर्ण सुगर एन्ड जनरल र इन्दिरा सुगर एन्ड एग्रो प्रालि उद्योगको बक्यौता ३८ करोड छ ।

लुम्बिनी चिनी उद्योगले १० करोड ७४ लाख रुपैयाँ भुक्तानी दिन बाँकी छ । त्यस्तै श्रीराम सुगर मिल्सको २६ करोड ७७ लाख ७८ हजार ६ सय २३ बक्यौता भुक्तानी बाँकी रहेकोमा किसानसँग सम्झौता भइसकेको मन्त्रालयले जनाएको छ ।

बाबा बैजुनाथ चिनी उद्योग र बागमती खाँडसारी मिल्स प्रालि सम्पर्कबिहिन भएका छन् । यी दुई उद्योगको ८ करोड ४१ लाख रुपैयाँ बक्यौता रहेको छ । कोरोना भाइरसका कारण उखु किसानले आन्दोलन गर्न नपाएपछि अब के गर्ने भन्ने चिन्ताले उनीहरुलाई थप समस्यामा पारेको छ ।