कोरोना भाइरस : प्रादेशिक अस्पतालमै छैन सतर्कता

न्यूज ब्यूरो, जनकपुरधाम । महामारीको रुपमा फैलिँदै गएको कोरोना भाइरसका कारण यत्तिबेला विश्व नै त्रसित बनेको छ ।

विश्वभरको सयबढी देशमा संक्रमण फैलिसकेको कोरोना भाइरसबाट विश्वको विभिन्न देशमा ६ हजारबढीको ज्यान पनि गइसकेको छ । कारोना भाइसरको डरले सशंकित बनेको विश्वले यत्तिबेला भाइरसबाट बच्न उच्च सतर्कता अपनाइरहेको छ ।

नेपालमा हालसम्म कोरोनाको संक्रमण नदेखिएपनि नेपालमा पनि सघन सतर्कता अपनाइएको छ । नेपाल सरकारले कोरोना भित्रिन सक्ने सम्भावनालाई मध्यनजर गर्दै सतर्क भएर सावधानी पूर्वक बस्न देशबासीलाई आग्रह गर्दै आएको छ ।

सरकारको आज बसेको मन्त्रिपरिषद् बैठकले कोरोनाबाट सतर्कता हेतु भोलि बिहीबारदेखि सञ्चालन हुने भनिएको माध्यमिक शिक्षा परीक्षा (एसईई) परीक्षा नै स्थगित गर्दै विभिन्न निर्णयहरु पनि गरेको छ । तर, सरकारले स्वास्थ्यलाई पहिलो प्राथमिकतामा राख्न पटकपटक आग्रह गर्दै आएपनि विरामीको स्वास्थोपचार गरिने ठाउँ अस्पतालमै चरम लापरवाही देखिएको छ ।

जनकपुरधामस्थित रहेको प्रादेशिक अस्पतालमा चरम लापरवाही देखिएको हो । अस्पताल जस्तो संवदेनशिल ठाउँमा झन सर्तकता अपनाउनु पर्नेमा प्रादेशिक अस्पताल प्रशासन गैर जिम्मेवार देखिएका छन् । न्यूज ब्यूरोको टोली बुधबार प्रादेशिक अस्पताल पुग्दा ईमेर्जेन्सी वार्डमा उपचाररत रहेको विरामीका कुरुवाहरु विना माक्सकै देखिए ।

विना माक्स आएका विरामी र विरामीसँगै बस्ने कुरुवालाई माक्स उपलब्ध गराएर वा लगाउन लगाएर सचेतता अपनाउन लगाउनु पर्नेमा अस्पताल प्रशासन गम्भीर देखिएन । एकजना कुरुवाले भने, ‘अस्पताल झन संवेदनशिल ठाउँ हो, यहाँ झन सतर्कता अपनाउनुपर्ने हो, तर अस्पतालको कुनै चाँसो देखिँदैन ।’

यस सम्बन्धमा प्रादेशिक अस्पतालका ईमेर्जेन्सी वार्ड ईन्चार्ज गोपाल साहसँग प्रतिक्रिया लिँदा पञ्छिन खोजे । उनले आफूलाई अस्पतालले माक्स उपलब्ध नगाएको भन्दै माक्स उपलब्ध गराउन नसक्ने प्रतिक्रिया दिए । ईमेर्जेन्सी वार्ड पनि अव्यवस्थित नै देखियो ।