विश्व प्रसिद्ध 'जानकी मन्दिर' गर्भगृहको २९ किलो चाँदी गैरकानुनी ?

न्यूज ब्यूरो, जनकपुरधाम । विश्व प्रसिद्ध जानकी मन्दिर मन्दिरको गर्भगृहको २९ किलो चाँदी कानुन विपरित फेरिएको खुलेको छ ।

मन्दिरको गर्भगृहमा लगाइएका पुराना चाँदी महन्त रामतपेश्वरदासले गैरकानुनी रुपमा फेरेको खुलासा भएको हो । मन्दिरको जग्गा बेचेको आरोप लाग्दै आएका महन्त दासले पुरातात्विक सम्पदालाई असर पर्ने गरी पुरानो चाँदी फेरेको कान्तीपुर समाचारमा धनुषाबाट अनिल मिश्रले गरेको रिपोर्टमा खुलेको छ ।

स्थानीय प्रशासन, गुठी संस्थानलगायतका सरोकारवालासँग अनुमति लिएर मात्र सार्वजनिक प्राचीन स्मारकमा कुनै किसिमको काम गर्न पाइने कानुनी प्रावधान रहेपनि महन्त दासले कसैलाई कुनै जानकारी नै नदिइ गर्भगृहको चाँदी फेरेका हुन्।

चाँदी फेरिएको सन्दर्भमा स्थानीय प्रशासनहरु अनभिज्ञता प्रकट गरेका छन् । गुठी सँस्थान, जिल्ला प्रशासन कार्यालय धनुषाबाट समेत कुनै प्रकारको अनुमति वा जानकारी नलिइ चाँदी फेरिएको हो ।

पछिल्लो समय जानकी मन्दिरलाई विश्वसम्पदाको सूचीमा सूचीकृत गराउन विभिन्न संघ–संगठनहरुले प्रयासहरु गरिरहेका छन् । तर, महन्तको कार्यले विश्वसम्पदामा सूचीकृत गराउन समस्या आउने सक्ने देखिएको छ ।

कुनै पुारतत्वीक वस्तुलाई अनाधिकृतरुपमा वा परिर्वतन गरेमा बिगो बमोजिम रकम असुल उपरगरि ५ हजारदेखि १ लाख रुपैयाँसम्म जरिबाना वा ५ वर्ष सम्म कैद वा दुबै सजाय हुने प्राचीन स्मारक संरक्षण ऐनको दफा १२ को (ग) मा उल्लेख छ ।