धनुषाको कमला नगरपालिकामा जोखिमपूर्ण स्कूल भवन बन्दै, जिम्मेवार को ?

न्यूज ब्यूरो, जनकपुरधाम । धनुषाको कमला नगरपालिकाको एक वडामा पूर्ण गुणस्तरीयहिन विद्यालयको भवन निर्माण गरिदैछ ।

प्रदेश नं. २ को सरकारको अनुदानमा निर्माण हुन लागेको सो विद्यालयको भवनमा कमसल समाग्री प्रयोग गरेपछि ढल्ने अवस्थामा देखियो । गत कार्तिकसम्म कामकाज ठप्प रहेको सो विद्यालयको भवन निर्माण कार्य पुनः सूचारु गरिएको छ ।

कमला नगरपालिका वडा नं. २ माचि झिटकैयाको खोक्साहा पूल नजिकै निर्माण हुन लागेको विद्यालयको भवनको गुणस्तरीयता अति कम रहेको देखिएको छ । भवनको अर्को फाउण्डेशन निर्माण अघि नै स्ट्रक्चर अर्थात बनाबट बाहिर भएको बताईएको छ । त्यसको लागि न्यूज ब्यूरो टिमले एक कुशल ईन्जिनीयरलाई बोलाएर भवनको बारेमा गोप्य अनुगमन गर्न लगाएको थियो ।

पिलर पहिले नै उठाउनुपर्नेमा, पहिले कमजोर पर्खाल खडा गरी दुवै तर्फबाट मसाला ढालेर पिलर बनाएको फर्मामा ।

सो अनुगमनको क्रममा निर्माणधिन विद्यालयको भवन स्ट्रक्चर आउट भएको खुलासा गरे । अहिलेको परिवेशमा निर्माण हुनुपर्ने त्यो पनि विद्यालय जस्तो भवनमा पूर्ण गुणस्तरीयता हुनुपर्नेमा अति गुणस्तरीयहिन कार्य भईरहेको देखिएको छ । केही वर्षमै सो भवन ढल्ने पनि दाबी गरिएको छ ।

विद्यालयको भवन निर्माण भईरहेको खेत बाढीग्रस्त छ । प्रत्येक वर्ष त्यहाँ बाढी पस्ने गरेको छ । त्यस्तो अवस्थामा पनि १० ईन्चको गुणस्तरीयहिन पर्खाल लगाइदै छ ।

पिलर ढाल्दा रड बाहिरै रहेको छ, मसाला भन्दा रड बाहिर आएपछि यसलाई अति कमजोर मानिन्छ ।

ईन्जिीयरले भने अनुसार, ढलान गरिएको पिलरको गुणस्तर अर्थात मजबुती निकै कम रहेको छ । मसाला (माल) अति कमजोर र अनुपात नमिलेको देखियो । सिमेन्ट र बालुवाको अनुपात मापदण्ड अनुसार हुनुपर्नेमा बालुवाको मात्र अत्यधिक भएको कारण पिलर भस्स भस्स जाने गरेको छ ।

यसका साथै, पर्खालमा लगाइएको पिलर पहिले देखि नभएर पर्खाल लगाएपछि दुवै तर्फबाट फर्मा लगाएर सिमेन्ट बालुवा दिएको छ , जो की अति कमजोर कार्य मानिएको छ । विना पिलरको पर्खाल दिँदा त्यसमा रकम बचत हुने र काम पूर्ण गुणस्तरीयहिन हुने बताइएको छ ।

फलामे रडलाई खिया (बिझ) ले पुरै खईसकेको अवस्था । कमजोर रड ।

“पिलरको माल एकदम लुज छ , कमजोर छ , यसको फाउण्डेशन पनि निकै कमजोर छ । रडमा खिया लागेर खाईसकेको छ । हल्का माटो फिल्ल हुँदा पर्खाल जब भत्कियो, अब झन माटो दिँदा त केही वर्षमै स्कूल ढल्छ, खस्छ , यो त अति कमजोर कार्य हो । कि त यसालाई फोडेर पुनः बनाउनुपर्छ त्यसमै बनायो भने यो कतिबेला खस्छ त्यसको कुनै ठेगान छैन ।”– ईन्जिनीयरले भने ।

निर्माणमा प्रयोग गरिएको ८ सुता, १२ सुता र १६ सुताको रडमा खियाले खाईसकेको अवस्था थियो । त्यससलाई परिवर्तन नै नगरी पुनः निर्माण गर्न थालिएको छ । यसले स्कूल भवनको लाईफ कमै दिन चल्ने दाबी गरिएको छ ।

यता, विद्यालय भवन निर्माण र त्यसमा प्रयोग गरिएको समाग्री तथा बनाबटको बारेमा कमला नगरपालिका वडा नं. २ का वडाध्यक्ष धनेश्वर यादवले काम गुणस्तरीय भईरहेको प्रतिक्रिया दिए । उनले विद्यालय भवन निर्माणमा कुनै खराबी नरहेको दाबी गरे । असार मसान्तमा बर्षाका कारण काम ठप्प भएपनि अहिले काम सूचारु रहेको बताए ।

दक्षिणतर्फको पर्खाल बीचमा माटो हालेपछि ढलेको दृश्य ।

सोही क्रममा कमला नगरपालिकाका ईन्जिनीयर लखनदेव यादवले मापदण्ड विपरित कार्य भएको पाईएमा कारवाही सहित पुनः फोडेर नयाँ बनाउनुपर्ने बताए ।

“ म ३÷४ महिनादेखि अनुगमनमा गएको छैन यो सत्य कुरा हो । अब गएर हेर्नैपर्छ । यदि गुणस्तरीयहिन र कमसल काम भएको पाईए भत्काएर नयाँ बनाउनुपर्ने छ । तर विद्यालय जस्तो भवनलाई कमजोर बनाउनु भएन । यसमा सयौं बालबालिकाको ज्यान हुन्छ ।”– उनले भने ।

प्रदेश सरकारको ५० लाख अनुदानमा विद्यालय भवन निर्माण कार्य भईरहेको छ । ( यसको भिडियो प्रमाण हामीसँग सुरक्षित छ )