प्रदेश २ः बिना दाईजोको 'आदर्श विवाह'

न्यूज ब्यूरो, जनकपुरधाम । ठूलो समस्याको रुपमा जड गाडेको कुप्रथा दाइजोलाई चुनौती दिँदै एक शिक्षित जोडी शुक्रवार बैवाहिक बन्धनमा बाँधिएका छन् ।

लक्ष्मीनिया गाउँपालिका– १ सोहनी सिनरजोडा हाल जनकपुर उपमहानगरपालिका १४ रजोल निवासी श्री राज किशोर यादवकी सुपुत्री कल्पना अधिकारी र धनुषाको सहिद नगर नगरपालिका (५ कट्टीका राम प्रसाद यादवका सुपुत्र राकेश कुमार यादव बिच बिना लेनदेन (दाईजोमुक्त) विवाह सम्पन्न भएको हो ।

राकेश यादव विगत केही वर्षदेखि एनएमबी बैंकमा कार्यरत छन् । यता बीबीए सम्मको पढाई पुरा नेपाल बैंकमा जागिरे कल्पना यादव पहिलादेखि नै विना दाइजो विवाह गर्ने संकल्प लिएकी थिईन् । कलेजमा पढिरहेको सिलसिलामा उनीहरू बीच चिनजान भएका थिए ।

दुवैतर्फका परिवार शिक्षित भएका कारण उनीहरु बिच बिना दाइजो विवाहका लागि सहमत भएका थिए । जनकपुर स्थित जानाकी बाटिका धर्मशालामा आयोजित समारोहमा मिथिलाको वैवाहिक परम्परा अनुसार राकेश र कल्पना बिच विवाह सम्पन्न भएको छ ।

हर्षोल्सापूर्ण माहौलका बिच आयोजित वैवाहिक समारोहमा उपस्थित जन्तीका साथै बर–वधु पक्षका आफन्तजनको उपस्थितिमा दुलहालाई महिलाहरुले परिछन (एक प्रकारको वैवाहिक उपक्रम) गर्दै महफिलमा आसन ग्रहण गराईयो ।

तत्पश्चात लोप हुँदै गएको डोली (काँधमा बोक्ने साधन) मा बसाएर दुलही कल्पनालाई परिक्रमा गराईएको थियो ।

यसरी दुलही बसेको डोलीलाई परिक्रमा गराईरहँदा उपस्थित महानुभावहरु केहीबेर भावविह्वल बनेका थिए । स्वयम्वर समारोहमा उनीहरुले एक–अर्कालाई माला तथा औंठी लगाए ।

तत्पश्चात उक्त अवसरमा महफिलमा कल्पनाका बुवा राजकिशोरले अभिनन्दन–पत्र दुलहाका बुवा राम प्रसादलाई हस्तान्तरण गर्दै समधी मिलन (एक–अर्का बिच गला मिलाउने) समेत गरे । यतिमात्र होइन, दुवैपक्षका नातेदार तथा मान्यजनहरुले उक्त विवाहको प्रसंशा गर्दै आशिर्वाद दिए ।

दाइजोका कारण तय भएको विवाह समेत नहुने, दाइजो नदिएका कारण बुहारीलाई अमानवीय व्यवहार गरिने जस्ता घोर निन्दनीय घटनाहरु भईरहँदा विना दाइजोको विवाह भईरहेको भनी जानकारी पाएपछि उनीहरुलाई बधाई सहित सम्मान गर्न प्रतिष्ठित व्यक्तित्वहरु समेत वैवाहिक समारोहमा उपस्थित भए ।

दुलहा–दुलहीलाई बधाई एवम् शुभकामना दिँदै उनले समाजिक रुपान्तरणका लागि चालेको कदमले सिङ्गो मानव सम्भयतालाई गौरवान्वित तुल्याएको बताईन् ।

दाइजो प्रथा विरुद्धको अभियानीहरुले समेत समारोहमै खुलेर नव दम्पतीको प्रसंशा गर्दै दाइजो कुप्रथालाई समाप्त पार्न शिक्षित युवायुवतीहरुले हिम्मतका साथ अगाडि आउनुपर्नेमा जोड दिईन् ।

शिक्षित युवाहरु समेत दाइजोरुपी लेनदेनको नाममा खरिद–विक्री भईरहेको भन्दै यसतर्फ सिङ्गो समाज गम्भीर हुनुपर्ने तथा युवायुवतीले समेत यस विरुद्ध खुलेर अगाडि बढ्नुपर्नेमा दुलहा राकेश यादवले प्रतिक्रिया जनाए ।

यस्तै दुलही कल्पनाले ‘न्युज ब्यूरो’सँग संक्षिप्त प्रतिक्रया दिँदै भनिन् ‘छोरा–छोरी बिचको विभेद मेटाएर अभिभावकहरुले छोरा सरह छोरीलाई पढाएर सक्षम बनाउनुपर्छ छोरीलाई कसैको सहारामा मात्र होइन स्वंमको सक्षम बनाउनुपर्छ, साथै शिक्षित युवाहरुले दाइजोलाई बहिष्कार गर्नुपर्दछ ।’

धेरै पढेका युवाहरुले यदी दाइजोरुपी लेनदेनमा संलग्न हुन्छन् भने शिक्षा र उपाधीको कुनै महत्व नरहने भन्दै समग्र युवायुवतीलाई गम्भीर बन्न उनले आग्रह गरिन् ।