केन्द्र सरकारको हस्तक्षेपले मधेशका किसान दुःखी : मन्त्री यादव

न्यूज ब्यूरो, जनकपुरधाम । प्रदेश नं. २ का आर्थिक मामिला तथा योजना मन्त्री विजय कुमार यादवले केन्द्र सरकारको हस्तक्षेत्रका कारण किसानहरु दुःखित भएको बताउनुभएको छ ।

आज (बुधबार) महोत्तरीको बलबा स्थित रहेको साना किसान सहकारी सँस्था लिमिटेडको १५ औं वार्षिक साधारण सभालाई सम्बोधन गर्दै मन्त्री यादवले साना किसानको माध्यमबाट स्थानीय किसानलाई आधुनिकता तर्फ अग्रसर गर्न सकिने बताउनुभयो ।

उहाँले नेपाल कृषि प्रधान देश भनिएपनि केन्द्र सरकारको विभेद कारण प्रदेश नं. २ का किसानहरु समेत कृषिमा क्रान्ती गर्न नसकेको बताउनुभयो । उहाँले कृषि सहकारी सँस्था मार्फत किसानहरुलाई समयमै ऋण दिएर भएपनि कृषितर्फ अग्रसर गरेको भन्दै यसलाई निरन्तरता दिन आग्रह गर्नुभयो ।

साना किसान कृषि सहकारी सँस्था बल्बाका अध्यक्ष रविन्द्र यादवको अध्यक्षता तथा मन्त्री यादवको प्रमुख आतिथ्यमा सम्पन्न भएको १५ औं वार्षिक साधारणसभामा मन्त्री यादवले अब कृषिमा क्रान्तीको लागि प्रदेश सरकारले बेग्लै रणनीति ल्याउन थालेको बताउनुभयो ।

सहकारी मार्फत प्रदेशका किसानहरुलाई समृद्ध बनाउन सकिने धारणा उहाँले राख्नुभयो । सो कार्यक्रममा सहकारीका अध्यक्ष यादवले आयव्यय सहित किसानहरुको सहयोगी भूमिकाको बारेमा वर्णन गर्नुभएको थियो ।