एक्जिट पोलको दावी : दिल्लीमा फेरी आम आदमी पार्टीकै सरकार

न्यूज ब्यूरो, एजेन्सी । विधानसभा निर्वाचन अन्तर्गत शनिबार भारतको राजधानी दिल्लीमा भएको मतदानमा सत्तारुढ आम आदमी पार्टी नै विजयी हुने भारतीय सञ्चारमाध्यमले सर्वेक्षण गरेका छन् ।

भारतीय सञ्चारमाध्यमले एक्जिट पोल सार्वजनिक गर्दै ७० सिट रहेको दिल्ली विधानसभामा सत्तारुढ आम आदमी पार्टीले सरकार बनाउनका लागि पर्याप्त सिट जित्ने भारतीय सञ्चारमाध्यमको सर्वेक्षण छ । एबीपी–सीभोटरले सार्वजनिक गरेको सर्वेक्षणमा आम आदमी पार्टीले ४९ देखि ६३ सिट, केन्द्रको सत्तामा रहेको भारतीय जनता पार्टीले ५ देखि १९ सिट र कांग्रेस पार्टीले चार सीटसम्म जित्नसक्ने उल्लेख छ ।

त्यस्तै, टाइम्स नाउले सार्वजनिक गरेको एक्जिट पोल सर्वेक्षणमा आम आदमी पार्टीले ४४, भारतीय जनता पार्टीले २६ सिट जित्ने जनाएको छ । रिपब्लिकको एक्जिट पोलमा पनि आम आदमी पार्टीकै जित देखिएको छ । रिपब्लिकको एक्जिट पोलमा आम आदमी पार्टीले ४८ देखि ६१ सिटसम्म जित्ने अनुमान छ ।

मतदानको औपचारिक नतिजा भने आगामी फेब्रुअरी ११ मा सार्वजनिक हुनेछ । ७० सदस्यको दिल्ली विधानसभाका लागि यस चुनावमा ६७२ जनाले उम्मेद्वारी दिएका छन् ।

शनिबार भएको मतदानमा राष्ट्रपति रामनाथ कोविन्द, पूर्व उपराष्ट्रपति हामिद अन्सारी, पूर्व प्रधानमन्त्री मनमोहन सिंह, मुख्यमन्त्री अरविन्द केजरीवाल, भारतीय जनता पार्टीका नेता लालकृष्ण आडवाणी र केन्द्रीय मन्त्री हर्षवर्धन र एस जयशंकरले पनि मतदान गरेका छन् । त्यस्तै, कांग्रेस अध्यक्ष सोनिया गान्धीसहित नेताहरु नेता राहुल गान्धी र प्रियङ्का गान्धीले पनि मत दिएका छन् ।