दिल्ली विधानसभा चुनाव : मतदान सम्पन्न, कसले कब्जा गर्ला सत्ता ?

न्यूज ब्यूरो, एजेन्सी । भारतको राजधानी नयाँ दिल्लीमा आज (शनिबार) विधानसभाको चुनाव सकिएको छ ।

दिल्ली सरकारको कार्यकाल यही फेब्रुअरी २२ तारिखमा सकिने भएकाले मतदान भएको हो । बिहान ८ बजे सुरु मतदान साँझ ६ बजेसम्म भएको बीबीसीले जनाएको छ ।

मदतानको परिणाम २ दिनपछि आउनेछ र त्यहाँको सत्ता कसको हातमा जानेछ भन्ने टुङ्गो लाग्नेछ । दिल्लीमा सरकार बनाउन कूल ७० सिटमध्ये ३६ सिट जित्नुपर्नेछ ।

यसअघिको चुनावमा भ्रष्टाचारविरोधी आन्दोलनकारीहरूले स्थापना गरेको एउटा नयाँ दल आम आदमी पार्टीले दिल्ली विधानसभाका लगभग सबै सिट जितेकाले यो चुनावलाई निकै महत्त्वसाथ हेरिएको छ । दिल्ली विधानसभामा कूल ७० सिट छन् । सन् २०१५ मा भएको निर्वाचनमा आम आदमी पार्टीले ६७ सिट जितेको थियो ।

यसपटक चुनावी मैदानमा कूल ६७२ उम्मेदवार छन् । तर दिल्लीको सत्ताधारी आम आदमी पार्टी, केन्द्रको सत्ताधारी भारतीय जनता पार्टी भाजपा र विपक्षी कङ्ग्रेसबीच त्रिपक्षीय भीडन्त हुने विश्लेषण गरिएको छ ।

आम आदमी पार्टी दोस्रो पटक पनि सत्ता हत्याउने कोसिसमा छ । बीबीसीका अनुसार लगातार तीनपटक दिल्लीको सत्तामा रहेको कङ्ग्रेस पनि पुनस् आफ्नो विरासत फर्काउने प्रयासमा छ । केन्द्रको सत्ताधारी भाजपाले पनि सत्ता हत्याउन सम्पूर्ण शक्ति लगाएको छ ।

दिल्लीमा सन् २०१३ डिसेम्बरमा पनि विधानसभा चुनाव भएको थियो । तर त्यसबेला कुनै पनि पार्टीले बहुमत ल्याउन सकेका थिएनन् । त्यसबेला भ्रष्टाचारविरोधी आन्दोलनबाट उदाएको आम आदमी पार्टी सबैभन्दा ठूलो दल बनेको थियो ।

उसले कङ्ग्रेससँग मिलेर सरकार बनाएको थियो । तर, उक्त सरकार ४९ दिन मात्र टिक्यो र पार्टीले स्वयम् सरकार छाडेर नयाँ चुनावको माग गर्यो ।

नेताहरूका विवादित भाषण र उठाइएका मुद्दाका कारण यसपालिको यो निर्वाचन निकै चर्चामा छ ।