ब्यूरो अपरेशन : सरकारी कर्मचारीले अस्पतालको निःशुल्क औषधी चर्को मूल्यमा बेच्दै !

न्यूज ब्यूरो, सिरहा । सरकारले सर्वसाधारण जनताको लागि निःशूल्क दिदै आएको औषधी नीजि पसलमा बेचिरहेको पाइएको छ ।

न्यूज ब्यूरोको अपरेशन टिमले गरेको १५ औं अपरेशनको क्रममा सिरहाको नर्हा गाउँपालिका वडा नं. २ स्थित एक पसलमा सरकारी औषधी चर्को मूल्य लिएर विक्री वितरण गरिरहेको पाईएको छ । त्यहाँ स्थित रहेको बेनाम(नाम नभएको) औषधी पसलमा सरकारी औषधीहरु फेला परेको हो ।

औषधीमा मूल्य समेत नभएपछि हाम्रो टिमले मूल्य सोध्दा १५ रुपैयाँ भनिएको थियो । जबकी त्यो औषधीमा मूल्यको कुनै टयाग नै लागेको छैन् । सरकारले आम जनताको लागि विभिन्न स्वास्थ्य सँस्थाहरु मार्फत निःशुल्क रुपमा औषधीहरु पठाउँछन् । तर, सरकारी कर्मचारीहरुले नै त्यहाँबाट चोरी गरी आफ्नो निजी क्लीनिक र पसलमा बेच्दै आएको पाईएको छ ।

नर्हा गाउँपालिका वडा नं. २ स्थित रहेको शिव शम्भु पोलिक्लीनिक नाम राखिएपनि त्यसमा कुनै प्रकारको त्यस्तो काम भईनरहेको पाईएको छ । आईतबार न्यूज ब्यूरो टिमले गरेको स्टींग अपरेशनको क्रममा पसल सँचालक समेत रहेका नर्हाको पानबारी स्वास्थ्य चौकीमा कार्यरत कर्मचारी प्रदीप यादव को पसलबाट सरकारी औषधी फेला परेको हो ।

सरकारले जुकाको औषधी (चालीको गोटी) सर्वसाधारणलाई निःशुल्क रुपमा पठाएपनि त्यही स्वास्थ्यचौकीमा कार्यरत ओपीडीका कर्मचारी प्रदीप यादवले आफ्नो नीजि पसलमा बेच्दै आएको रहस्य खुलेको छ । यादव, पानबारी स्वास्थ्यचौकीमा ओपीडी शाखामा कार्यरत छन् । यादव ड्युटिको समय अस्पतालमा हुँदा उनको जेठो भाई पसल सँचालन गर्ने गरेको छ ।

भिडियोमा हेर्नुहोस् ।

स्टीँग अपरेशनको क्रममा हाम्रा पूर्वाञ्चल सहकर्मी सबिन बाबू यादव नर्हा गाउँपालिका वडा नं. २ पानबारी स्थित रहेको ती पसलमा पुग्छन् । उनले जुकाको औषधी माग्छन् । पसलले जुकाको औषधी दिएर एउटाको १५ रुपैयाँ माग्छन् । हाम्रा सहकर्मीले मूल्य देखाउन भनेपछि उनको सात्तो जान्छन् । “मूल्य नै नभएको औषधीको १५ रुपैयाँ कसरी दिने ? तपाई मूल्य लेखेको देखाइदिनुस, म १५ रुपैयाँ दिन्छ भनेर भनेपछि पसले भाग्न खोज्छन् ।

तर, सरकारी औषधीमा उत्पादन तिथि, म्याद सकिने तिथि बाहेक मूल्य भने तोकिएको हुँदैनन् । सोही आधारमा सरकारी अस्पतालको औषधी रहेको र त्यहाँबाट चोरी गरी ल्याएर बेचेको भनेपछि पसले तर्सिन्छ । त्यही औषधीको पत्तालाई लिएर न्यूज ब्यूरो टिम पानबारी स्थित रहेको सरकारी अस्पतालमा जान्छन् ।

त्यहाँ पुगेपछि अस्पतालका ईन्चार्ज (स्वास्थ्यचौकी प्रमुख) दिलीप सिँहले त्यो औषधी अस्पतालकै रहेको पुष्टि गर्नुभयो । अस्पतालमा केही दिन पूर्व मात्र जनस्वाथ्यबाट औषधी मगाएको भन्दै उहाँले पसलबाट लगिएको जुकाको औषधी त्यही अस्पतालको रहेको पुष्टि गरेपछि त्यहाँ कार्यरत सरकारी कर्मचारी प्रदीप यादवले भने कुरा मिलाउन भने ।

न्यूज ब्यूरो टिमलाई रकमको लोभ समेत दिएका थिए । “केही लिएर चुप बसिदिनुपरयो, यो कुरा समाचारमा आउनु भएन, एक पटकको लागि माफ गरिदिनुस् ।” भन्दै न्यूज ब्यूरो टिमलाई रकमको लोभ समेत दिएका थिए, तर हामीले आफ्नो स्टीँग अपरेशनलाई मूर्त रुप दियौं ।

स्टीँग अपरेशनपछि गाउँका नेताहरुले त्यसलाई समाचारमा प्रकाशित नगर्न तथा केही लेनदेन गरी मुद्दालाई त्यही रफादफा गर्न दबाब पनि दिए, तर न्यूज ब्यूरो कुनै दबाबको अगाडी झुकेनन् । ईन्चार्ज सिँहले समेत एकपटकको लागि माफ गरिदिन आग्रह गरेका थिए । सर्वसाधारणहरुको लागि सरकारले ७० प्रकारको औषधी निःशुल्क दिँदै आएको छ ।