पतिलाई अपहरण गर्न पत्नीलाई गोली हानी हत्या गर्ने १२ वर्षपछि पक्राउ

न्यूज ब्यूरो, वीरगँज । प्रदेश नं. २ प्रहरीले विगत १२ वर्षदेखि फरार रहेका अभियुक्तलाई पक्राउ गरी सार्वजनिक गरेको छ ।

शरिर बन्धक तथा कर्तव्य ज्यान मुद्दामा विगत १२ वर्षदेखि फरार रहेका अभियुक्तलाई जिल्ला प्रहरी कार्यालय पर्साले पक्राउ गरी अदालतमा बुझाएको हो । पर्साको उदयपुर घुर्मी गाविस (तत्कालिन) वडा नं. २ बस्ने अन्दाजी वर्ष ४५ का पन्नालाल साह सोनारलाई अपहरण गर्ने क्रममा उनकी श्रीमति देवमति देवीलाई गोली हानी हत्या गरेको थियो ।

सो मुद्दामा तत्कालिन उदयपुर घुर्मी गाविस वडा नं. ६ तथा हाल वीरगँज महानगरपालिका वडा नं. २७ बस्ने भागिरथ प्रसाद यादवको छोरा अन्दाजी वर्ष ४५ का विक्रम यादवलाई प्रहरीले पक्राउ गरी अदालतलाई बुझाएको हो ।

पन्नालालकी श्रीमति देवमति देवीलाई गत वि.सं. २०६५ साल भदौ २० गते राती ८ः२० बजेको समयमा गोली हानी घाईते बनाएका थिए । उनको उपचारको क्रममा मृत्यु भएको र वारदात पश्चात फरार रहेका यादवलाई पक्राउ गरी अदालतमा बुझाएको हो ।

जिल्ला प्रहरि कार्यालय पर्साबाट फरार प्रतिवादी पक्राउ गर्न खटिएको प्रहरी टोलीले उनकै गाउँघरमा लुकिछिपि बसी रहेको अबस्थामा फेला पारी नियन्त्रणमा लिएर कारवाहीको लागि जिल्ला अदालत पर्सामा बुझाएको हो ।