जनकपुरमा ठुलो चाईनिज पेस्तोल सहित 'झा' र 'यादव' पक्राउ

न्यूज ब्यूरो, जनकपुरधाम । जनकपुरको भानुचोकबाट ठुलो चाईनिज पेस्तोल जस्तो देखिने पेस्तोल सहित दुई जनालाई धनुषा प्रहरीले नियन्त्रणमा लिएको छ ।

जनकपुरधाम उपमहानगरपालिका वडा नं. १ भानुचोकबाट साँझ करिब ६ बजे जिल्ला प्रहरी कार्यालय धनुषाको टोलीले दुई जनालाई पेस्तोल र त्यसमा लाग्ने मैगजीन, गोली सहित पक्राउ गरेको हो ।
बा.१४ च. ७४५९ नम्बरको महेन्द्र कारले ज.९ प. ४८०६ नम्बरको मोटरसाईकललाई ठक्कर दिदा मोटरसाईकलमा सवार दुई जना घाईते भएपछि रहस्य खुलेको हो ।

मोटरसाईकलमा सवार महोत्तरी जिल्लाको पिपरा गाउँपालिका वडा नं. ५ बस्ने बर्ष २० को पारस कुमार यादव र मोटरसाईकल पछाडी बसेका धनुषाको हँसपुर नगरपालिका वडा नं. २ बस्ने शिव कुमार मण्डललाई उक्त कारले ठक्कर दिएको थियो । ठक्कर पछि यादवको बायाँ खुट्टा र दाहिने हातमा चोट लागेको तथा पछाडी सवार मण्डलको बायाँ हातमा चोट लागेको थियो । उनीहरुको उपचार धनुषा अस्पतालमा भईरहेको छ भने उनीहरुको अवस्था समान्य रहेको जनाइएको छ ।

घटनाको जानकारी पाएलगत्तै जिल्ला प्रहरी कार्यालय धनुषाका प्रहरी प्रवक्ता एवम् डिएसपी रामेश्वर कार्कीको नेतृत्वमा भानुचोक पुगेको प्रहरी टोलीले दुबै सवारी साधन नियन्त्रणमा लिएर जिल्ला प्रहरी कार्यालय धनुषामा गएको थियो । सोही क्रममा शंकाको आधारमा कारलाई चेकजाँच गर्दा उक्त कारको डिक्की भित्र लुकाई छिपाई राखिएको ठूलो चाईनिज पेस्तोल जस्तो देखिने पेस्तोल र त्यसमा लाग्ने ६ राउण्ड गोली र १ थान म्यगजिन बरामद भएको हो ।

पेस्तोल बरामद भएपछि कार चालक जिल्ला धनुषा क्षिरेश्वरनाथ नगरपालिका वडा नं. १ रम्दैया बस्ने अन्दाजी बर्ष ४२ को जितेन्द्र कुमार यादव र सोहि कारमा सवार क्षीरेश्वरनाथ नपा ५ बस्ने बर्ष ३० को कुमोद नारायण झालाई नियन्त्रणमा लिएको हो । कारलाई समेत नियन्त्रणमा लिएर अनुसन्धान थालिएको जनाइएको छ ।