राष्ट्रपति रनिङ शिल्डको लागि तयार रहन मेयर बरबरियाको निर्देशन

न्यूज ब्यूरो, जनकपुरधाम । धनुषा शहिदनगर नगरपालिकाका नगर प्रमुख (मेयर) उदय कुमार बरबरिया यादवले राष्ट्रपति रनिङ शिल्ड खेलकूदको लागि सबै विद्यालयलाई तयार रहन निर्देशन दिनुभएको छ ।

आयोजना हुने नगरस्तरीय राष्ट्रपति रनिङ शिल्ड खेलकुद प्रतियोगिताका तयारीको लागि मेयर बरबरियाले पूर्ण रुपमा तयार हुन आग्रह समेत गर्नुभएको छ । शहिदनगर नगरपालिका भरिको सबै समुदायिक विद्यालयलाई तोकिएको समय भित्र आफ्नो दर्ता गराउन निर्देशन दिएको हो ।

शहिदनगर नगरपालिका भित्र रहेको जम्मा ३२ वटा समुदायिक विद्यालयलाई राष्ट्रपति रनिङ सिल्ड प्रतियोगिताको लागि भाग लिने खेलाडीको नाम, कक्षा, इमिस नम्बर, फोटो सहितको नामाबली आउँदो मा १६ गतेभित्र नगर शिक्षा समितिमा बुझाउनुपर्ने भनिएको छ । १६ गतेभित्रमा दर्ता नभएको खण्डमा त्यसपछि दर्ता नहुने तथा विद्यालयलाई प्रतियोगिताको कुनै पनि खेलकूदमा भाग लिन नपाउने उल्लेख गरिएको छ ।

नगर शिक्षा समितिले जारी गरेको चलानी नं. ४६ को पत्रमा नगरको सबै मावि, प्रावि र निमावी तहका विद्यालयका विद्यार्थीहरुलाई खेलाडीको रुपमा छनौट गरी पठादिन अनुरोध गरिएको छ । त्यसको लागि ३२ वटै समुदायिक विद्यालयमा पत्राचार गरिसकेको जनाइएको छ ।

राष्ट्रपति रनिङ शिल्ड अन्तर्गत हुने खेलकूद प्रतियोगितामा सबै तहको लागि १०० मिटरको दौड, २०० मिटरको दौड, नि.मा.वि. र मावि तहको लागि ४०० मिटर, ८०० मिटर र १५०० मिटरको दौड, मावि तहको लागि १०० मिटर र ४०० मिटरको ४ फेरा र १ फेरा लगाउने, लँग जम्प र हाई जम्पको लागि सबै तहलाई सहभागी हुन आग्रह गरिएको छ ।

नगर शिक्षा समितिका अधिकृत धिरेन्द्र लाल कर्णद्धारा जारी गरिएको पत्रमा निमावि र मावि तहको लागि ट्रिपल जम्प, जेभेलिंग थ्रु र पुट सट तथा मावि तहको लागि कपर्दी, भलिवल र फुटबलको समेत आयोजना गरिएको जनाइएको छ उक्त प्रतियोगितमा भाग लिनको लागि विभिन्न नियमहरु लगाइएको छ ।

सो क्रममा एउटा खेलाडीले दुई ओटा फिल्ड र एक ओटा ट्रयाक वा एक ओटा फिल्ड र दुई वटा ट्रयाकमा मात्र भाग लिन पाउने, यो नियम रिले दौड, भलिवल, फुटवल र कपर्दी को लागि मान्य नहुने, विद्यालयले आ–आफनो खेलाडीलाई खेलकुद पोशाकमा ल्याउनु पर्ने र साथै विद्यालयको व्यानर र झण्डा पनि हुनु पर्ने नियम लागू गरिने जनाइएको छ ।

यसका साथै, फुटवल बाहेक सम्पुर्ण इभेन्टमा छात्र तया छात्राहरुले अलग अलग भाग लिन सक्ने जनाइएको छ ।