प्रहरीको काम सराहनीय छ, दोषी उम्कन पाउँदैनः पूर्वमन्त्री महासेठ

न्यूज ब्यूरो, जनकपुरधाम । पूर्व भौतिक पूर्वाधार तथा यातायात मन्त्री रघुवीर महासेठले दिलीपको हत्यारा उम्कन नपाउने बताउनुभएको छ ।

धनुषा निर्वाचन क्षेत्र नं. ४ का प्रतिनीधि सभा सदस्य समेत रहनुभएका पूर्वमन्त्री महासेठले दिलीपको हत्या प्रकरणमा ढल्केवर ईलाका प्रहरीले छानविन तथा अनुसन्धानको लागि महत्वपूर्ण भूमिका निर्वाह गरेको भन्दै प्रशंसा गर्नुभयो । उहाँले नेपाल प्रहरीप्रति आफ्नो विश्वास जनाउँदै दोषी कुनै पनि हालतमा उम्कन नपाउने बताउनुभयो ।

गत शुक्रबार अवैद्य उत्खनन विरुद्ध बोलेका धनुषाको मिथिला नगरपालिका वडा नं. ५ बस्ने दिलीप भन्ने ओम प्रकाश महतोलाई क्रसर सँचालकहरुले उनलाई हत्या गरेपछि उनको घरमा पुगेर श्रद्धाञ्जली अर्पण गर्दै संवेदना प्रकट गर्नुभएको छ । सो क्रममा उहाँले दिलिपलाई देशको लागि पहिलो पर्यावरण सहिद घोषणा गर्न सरकारसंग माग समेत गर्नुभयो ।

“दिलिप जस्तो होनहार युवालाई सुनियोजित तरिका मार्नु ठूलो दुःखद घटना हो छ । अपराधीलाई कानुन दायरामा ल्याएर कानुनी कारवाही हुन्छ । नेपाल प्रहरीप्रति मेरो विश्वास छ । ढल्केवर प्रहरीले घटनाको विहानैपख नै सबै आरोपितहरुलाई पक्राउ गर्न देखाएको दक्षता प्रशंसनीय छ । दोषी जुनसुकै हालातमा पनि उम्कन पाउँदैन ।”– उहाँले भन्नुभयो ।

पीडित परिवारलाई भेटघाटको क्रममा दिलीपको घर पुगेका महासेठले दिलीपलाई पर्यावरण शहिद घोषणाको लागि आफू संघीय सदनमा समेत आवाज उठाएको बताउनुभयो । नदीनाला दोहन, वातावरण विनासको विरुद्ध आवाज उठाएको भन्दै नेपाल सरकारबाट क्षतिपूर्तिको लागि माग गरेको बताउनुभयो । उहाँले दिलीपको हत्या प्रकरणमा सबै निकायसँग सम्पर्कमा बसेको बताउनुभयो ।

नेता महासेठले दिलीप हत्या प्रकरणमा निष्पक्ष छानविनको लागि धनुषाका प्रहरी प्रमुखसँग समेत कुरा गरेको बताउँदै उहाँले दिलीपलाई पर्यावरण सहिद घोषणामा शंका नगर्न पीडित परिवारलाई आग्रह गर्नुभयो । अवैध उत्खननको विरोध गर्दै आएका दिलीपको शुक्रबार बिहान हत्या भएको थियो ।

हत्यामा संलग्न भएको आरोपमा प्रहरीले चार जनालाई पक्राउ गरि सार्वजानिक गरेको छ । पक्राउ पर्नेमा क्रसर सञ्चालक मिथिला नगरपालिका वडा नम्बर ५ का २७ वर्षीय बिपिनकुमार महतो, टिपर चालक महोत्तरी बर्दिबास नगरपालका वडा नम्बर ९ का मुनिन्द्र महतो, लोडर चालक बर्दिबास वडा नम्बर २ का जितेन्द्रकुमार महतो र धनुषा मिथिला नगरपालिका वडा नम्बर ५ का २७ वर्षीय रोशनकुमार यादव रहेका छन् ।