सिरहा : मोबाइल चार्ज गरिदिने भन्दै युवतिमाथि सामुहिक बलात्कार

न्यूज ब्यूरो, सिरहा । सिरहाको गोलबजारमा एक किशोरीमाथि सामूहिक बलात्कार भएको छ ।

सिरहाको विष्णुपुर गाउँपालिका घर भएकी युवती गोलबजार नगरपालिका वडा नम्बर ६ आफन्तकोमा जानेक्रममा आइतबार राति उनीमाथि सामूहिक बलात्कार भएको हो । घरबाट गोलबजार आउँदा रात परेको र मोवाइलमा चार्ज सकेर अफ भएकोले मोवाइल चार्ज गर्न गोलबजार ६ मा रहेको मनकामना हेयर कटिङ सैलुनमा पुगेकी थिइन् ।

सैलुनमा पहिलेदेखि नै रहेका धनगढीमाई नगरपालिका ८ वहुवाडाँडाका सुरेश कुमार यादव र गोलबजार नगरपालिका २ गुरुधामका सन्तोष महतोले मेरो डेरामा चार्जर छ त्यही हिँड चार्ज गरिदिन्छु भन्दै डेरामा लगेर जवरजस्तीकरणी गरेका हुन् ।

मोवाइल चार्ज गर्न दिएको एक घण्टाभन्दा बढी समय भइसक्दा पनि मोवाइल नदिएपछि मोवाइल लिन डेरामा पस्दा जवरजस्ती ढोकाको चुक्कुल लगाएर करणी गरेको पीडित युवतीलाई उद्धृत गर्दै इलाका प्रहरी कार्यालय गोलबजारका प्रमुख इन्सपेक्टर जनक पुरीले बताए ।

घटनापछि सडक पेटीमा आएर रोइरहेको युवती देखेपछि स्थानीयले प्रहरीलाई खवर गरेको थियो । तत्काल पुगेका प्रहरीले युवतीलाई उद्धार गरी सन्तोषको डेरामा पुगेर दुवैलाई नियन्त्रणमा लिएको प्रहरीले जानकारी दिए ।

पक्राउ परेका युवकहरु र युवतीको समेत स्वास्थ्य परीक्षण गरेको प्रहरीले जनाएको छ । यसबारे थप अनुसन्धान भइरहेको जनाइएको छ ।