अमेरिका-इरान तनाव : युद्धको घोषणा, इरानका ५५ स्थान अमेरिकाको निशानामा

न्यूज ब्यूरो, एजेन्सी । अमेरिकाको हवाई आक्रमणमा इरानी सेनाका एक कमाण्डर मारिएपछि इरानले युद्धको घोषणा गरेको छ ।

अमेरिकी सेनाले बिहीबार साँझ इराकको बगदाद विमानस्थलमा गरेको हवाई आक्रमणबाट इरानी सेनाका कमाण्डर कासिम सुलेमानीको मृत्यु भएको थियो । सुलेमानीको मृत्युपछि अमेरिकासँग बदला लिने उद्घोष गरेको इरानले शनिबार युद्धको घोषणा नै गरेको हो ।

इरानले तेहरानस्थित जामकरन मस्जिदको मिनार (मस्जिद) मा रातो झण्डा फहराएको अन्तराष्ट्रिय सञ्चारमाध्यमहरुले जनाएका छन् । मिनारमा रातो झण्डा फहराउनु रक्तपात, युद्ध, युद्धको अवस्थामा सतर्कता, देशको लागि बलिदान लगायत अर्थ लाग्छ ।

इरानले यसरी मस्जिदमा रातो झण्डा फहराएको यो पहिलो पल्ट हो । यसअघि जामकारन मस्जिदको मिनारमा सधैं धार्मिक झण्डा फहराइन्थ्यो । यसैबीच इरानले अमेरिकाका ३५ स्थानमा आक्रमण गर्नका लागि ‘रेकी’ गरेको बताएको छ ।

आफ्ना सैन्य कमाण्डर मारिएको बदलामा त्यहाँका एक सैन्य जनरलले अमेरिकाका ३५ सहरमा आक्रमणका लागि रेकी गरिएको चेतावनी दिएका हुन् । उनको चेतावनीपछि अमेरिकाले इरानका ५५ ठाउँमा आक्रमण गर्ने चेतावनी दिएको छ ।

राष्ट्रपति डोनल्ड ट्रम्पले इरानले आक्रमण गरेमा इरानका धार्मिक, सांस्कृतिक तथा ऐतिहासिक सम्पदाहरु रहेका ५५ ठाउँमा अमेरिकाले आक्रमण गर्ने चेतावनी दिएका हुन् । अमेरिका र इरानले युद्धका लागि खुलमखुला स्थानहरु तोकेपछि मध्यपूर्वी एसिया क्षेत्रमा युद्धको त्रास फैलिएको छ ।