छात्राहरुको गुनासो : 'मुख्यमन्त्री ज्यूको कार्यक्रममा हामि कहिले सामिल हुने' ?

न्यूज ब्यूरो, जनकपुरधाम । मुख्यमन्त्रीको 'बेटी पढाउ, बेटी बचाउ' अभियान तीव्र रुपमा चलिरहँदा जनकपुरदेखि केही दुरीमै रहेको धनुषाधामका छात्राहरुलाई भने अझ छुन नसकेको अवस्था छ ।

धनुषाको धनुषाधाम नगरपालिका वडा नं. ३ स्थित रहेको धनुष जनता उच्च माध्यमिक बिधालय धनुषाधामकी छात्राहरुले आफूहरु कहिले मुख्यमन्त्रीको कार्यक्रममा सामेल हुन पाउने भनेर प्रश्न गरेकी छन् । प्रदेशका मुख्यमन्त्रीको अभियान बेटी पढाउ, बेटी बचाउ अन्तर्गत समुदायिक विद्यालयकी छात्राहरुलाई साईकल वितरण कार्यक्रम राखिएको छ । जस अन्तर्गत धनुषा सहित ८ वटै जिल्लाको विभिन्न समुदायिक विद्यालयमा साईकल वितरण कार्यक्रम भएपनि उक्त विद्यालयमा त्यो कार्यक्रम अहिलेसम्म नगएपछि उनीहरु प्रश्न गरेकी हुन् ।

प्रदेशको अस्थायी राजधानी एवम् जिल्लाको सदरमुकाम जनकपुरदेखि २० किलोमिटरकै दुरीमा रहेको धनुषाधाम स्थित उक्त विद्यालयमा मुख्यमन्त्रीको कार्यक्रम अहिलेसम्म नगएपछि उनीहरुले मुख्यमन्त्री अयिभानको सुविधाबाट आफूहरु बञ्चित भएको बताउँछिन् । उक्त वडामा अल्पसँख्यक, सीमान्तकृत र दलित समुदायका छात्राहरुको बाहुल्यता रहेको छ । न्यूज ब्यूरोसँग गुनासो पोख्दै छात्राहरुले भनिन्,- "मुख्यमन्त्री ज्यूले चाल्नुभएको कदम एकदम सराहनीय छ, तर सीमित ठाउँको लागि मात्रै किन ? हामीहरु पनि त यस जिल्लाकै हौ, यसै प्रदेशका हौ, यति नजिकै यो अभियान अहिलेसम्म किन आएनन होला ? यसमा पनि राजनीतिक कारण त पक्कै छैन होला की ?"

यता, विद्यालयका सह-प्रधानाध्यापक राम पुकार यादवले मुख्यमन्त्री कार्यक्रमको लागि यहाँबाट उनका प्रतिनीधिहरु कैयौं पटक नामाबली लिएर गएको सुनाउँदै अहिलेसम्म कुनै जवाफ नआएको बताए ।