धनुषा : सबैला नगरपालिकामा एक वडाध्यक्षको घर नै वडा कार्यालय

न्यूज ब्यूरो, धनुषा । धनुषाको सबैला नगरपालिमा एक वडाध्यक्षले आफ्नै घरमा वडा कार्यालय सञ्चालन गर्दै आएपछि अन्नतः स्थानीयले चाँसो लिएको छ ।

सबैला नगरपालिका ५ का वडाध्यक्ष देबेन्द्र प्रसाद यादव आफ्नै घरमा वडा कार्यालय सञ्चालन गर्दै आएका छन् । स्थानीयहरुले त्यसप्रति चाँसो लिँदै वडा कार्यालयको व्यवस्थापन गरेर कार्यालय सञ्चालन गर्न माग गरेका हुन् ।

उनीहरुले नगरका प्रमुख प्रशासकीय अधिकृतलाई ध्यानकर्षण गराउँदै सार्वजनिक ठाउँमा वडा कार्यालय सञ्चालन गराउन माग गरेका छन्् । एक स्थानीय भने, ‘वडा कार्यालय सार्वजनिक स्थलमा हुनुपर्यो, तर यहाँ व्यक्तिगत आफ्नो घरमा राखिएपछि सर्वसाधारणलाई निकै कठिनाई हुँदै आएको छ ।’

वडाध्यक्षले आफ्नो घरमा वडा कार्यालय सञ्चालन गर्नु गलत रहेको भन्दै यथाशिघ्र सुनुवाई गर्न माग गरिएको छ । यता, प्रमुख प्रशासकीय अधिकृत राजेन्द्र कार्कीले वडा कार्यालयको भवन नभएका कारण वडाध्यक्षकै घरमा कार्यालय सञ्चालन गर्नुपरेको बताए । उनले सर्वसाधारणलाई समस्या भएको गुनासो आएपछि घर भाडामा लिएर भएपनि चाँडै वडा कार्यालयको व्यवस्थापन गर्ने जनाए ।