सरकार छाड्न उपेन्द्र यादवलाई प्रधानमन्त्रीको सुझाव !

न्यूज ब्यूरो, जनकपुरधाम । सत्तारुढ गठबन्धनभित्र खटपट देखिएको छ । प्रधानमन्त्री केपी शर्मा ओलीले सत्ता साझेदार दल समाजवादी पार्टीलाई व्यवहार सुधार्न चेतावनी दिएपछि सत्तारुढ गठबन्धनभित्रको खटपट सार्वजनिक भएको हो ।

प्रधानमन्त्री ओलीले समाजवादी पार्टीका अध्यक्षसमेत रहेका उपप्रधानमन्त्री एवम् स्वास्थ्य मन्त्री उपेन्द्र यादवलाई सरकारमै रहेर सरकारको आलोचना गर्नु नैतिक हिसाबले उचित नहुने भन्दै आलोचना गर्ने हो भने सरकार छाड्न सुझाव दिएका हुन् । स्रोतका अनुसार प्रधानमन्त्रीले एक हफ्ताको समय दिँदै आफै राजीनामा दिएर मार्ग प्रशस्त गरिदिन आग्रह गरेका छन् ।

सरकारमा रहेर आलोचना गर्ने प्रवृत्ति कायम राखेमा मन्त्रिपरिषद पुनर्गठनका क्रममा आफूले पनि सत्ता साझेदारीबारे पुनर्विचार गर्ने भन्दै प्रधानमन्त्री ओलीले यादवलाई सरकारबाट हटाउने संकेत दिएका हुन् । प्रधानमन्त्रीको यस्तो चेतावनीपछि समाजवादी पार्टी भने दोधारमा परेको छ ।

स्रोतका अनुसार उपप्रधानमन्त्री यादवले सरकारमै रहने वा सरकारबाट बाहिरिने भन्नेबारे तत्काल निर्णय लिन सकेका छैनन् । पार्टी्भित्र छलफल गरेर आवश्यक निर्णय लिने उनको योजना रहेको निकट सहयोगीले जनाएका छन् । यस विषयमा कात्तिक ३०–३१ गते बस्ने पार्टीको केन्द्रीय समिति बैठकमा छलफल हुने बताइएको छ । सो बैठकमा राजपा नेपालसँगको एकताको विषयमा पनि छलफल हुनेछ ।