दीपावलीमा विश्व कीर्तिमान बनाउँदै अयोध्या, जनकपुरका कलाकार पनि सहभागी

न्यूज ब्यूरो, जनकपुरधाम । सरयू नदी किनारमा निर्मित रामकी पौडीमा चारैतिर दियो नै दियो देखिन्छन् ।

घाँटीमा भोलेन्टियरको कार्ड झुण्ड्याएका सयौं युवा दियोलाई लामवद्ध सजाइरहेका छन् । कतै दियोलाई फूलको डिजाइन दिइएको छ भने कतै स्टिल फ्रेममा टाँसेर नयाँ स्वरुप दिइएको छ ।

यो हो–हल्लाबाट बेखबर केही स्थानीय पेन्टर, घाटका सिढीमा कार्डबोर्डबाट बनाइएका हात्ती, घोडा र उँटमा रंग भरिरहेका देखिन्छन् । रामद्वार नजिकको सडक र मंदिर सजाइँदैछ । दुई वर्ष अघिदेखि अयोध्यामा दीपोत्सव आयोजना गर्न थालिएको हो ।

यसवर्ष आजै साढे पाँच लाख दियो एकैपटक बालेर गिनिज बुक अफ वल्र्ड रेकर्डमा दर्ता गराउने कार्यक्रम छ । अघिल्लो वर्ष दीपोत्सवमा दक्षिण कोरियाकी किम जाग सुक प्रमुख अतिथि थिइन् भने यसपटक फिजीकी मन्त्री वीणा भटनागर आउँदैछिन् ।

उत्सवमा विरह गायनका लागि जनकपुरबाट कलाकारको टोली सहभागी हुने नवभारत टाइम्सले उल्लेख गरेको छ । जनकपुर सीताको माइती भएको र विवाहपछि विदाईका बेलाको गीत गाउनका लागि जनकपुरका कलाकारको टोली निपूर्ण रहेको उसले उल्लेख गरेको छ ।

राति आठ बजेदेखि १० बजेसम्म नेपाल, भारत, श्रीलंका, इन्डोनेशिया र फिलिपिन्सका कलाकारहरुले आ–आफ्नो परम्परा अनुसार रामलिला मञ्चन गर्ने पनि जनाइएको छ ।

उत्तर प्रदेश सरकारले रामायणमा उल्लेख भए अनुसारका कैयौं झाँकी जुलुश निकाल्ने व्यवस्था मिलाएको छ । हेलिकप्टरबाट राम र सीताको प्रतिरुप अवतरण गराएर भरत मिलाप गराउने कार्यक्रम पनि तय भएको छ । त्यसपछि आरती र दीपोत्सव आयोजना जनाइएको छ । योगी आदित्यनाथ मुख्यमन्त्री भएपछि यहाँ ठूलो परिवर्तन आएको छ।