उमेश यादवको घाँटी काट्ने सजाय माफ, अब आउने कहिले नेपाल ?

न्यूज ब्यूरो, सउदी । विगत १३ वर्षदेखि सउदी अरबीयाको जेलमा कैदी जीवन विताईरहेका धनुषाका उमेश यादवको घाँटी काट्ने सजाय माफ गरिएको छ ।

सउदी अरेबिया स्थितको उच्च अदालतद्धारा उनको सजाय माफ गरिएको हो । एक पाकिस्तानी नागरिक हत्या अभियोगमा मृत्यूदण्ड सुनाइएका उमेश यादवलाई नेपाली दुतावास र अभियानी सरोज रायको पहलमा कानुनी प्रक्रियागत माफी दिइएको अभियानी रायले आफ्ना फेसबुक मार्फत जानकारी गराएका छन् । आजभोली गर्दै उमेश यादव घर फर्कने भन्दै प्रतिक्षामा रहेका उनका शुभचिन्तकहरुले उमेश यादव कहिले घर फर्कने भनेर बेलाबेलामा प्रश्न गरिरेहको बेला रायले आफ्नो फेसबुक मार्फत प्रष्टयाएका छन् ।

उमेश बस्ने जेलबाटै सजाय काटेर बाहिर आएका दुई जना नेपालीले उमेशको सजाय माफ भएको तथा पाकिस्तानबाट कागजात लिएर आए मात्र रिहा गर्न मिल्ने बोलेका छन् । उनले भनेका छन्, गत अक्टोबर १ देखि नै त्यो जेलमा नयाँ जेलर आएको छ । उनले भनेका छन् की उमेश तिमि पाकिस्तानको कागजात मगाउ, तिमीलाई तुरुन्तै रिहा गरिने छ ।

उच्च अदालत सउदीको फैसला अनुसार उमेशलाई दिइएको सजाय माफ गरेको उल्लेख रायले आफ्नो भिडियो सन्देशमा गरेका छन् । अदालतले माफीनामा दिएको तथा रिहा गर्ने फैसला दिएलगत्तै रिहा गर्नुपर्ने प्रावधान रहेपनि उनलाई कागजात माग गरिएको जनाइएको छ । आफू पाकिस्तान जाँदा भिसा त्यही सकेको र पुनः जानको लागि भिसा चाहिएको जनाउँदै नेपाल सरकारको परराष्ट्र मन्त्रालयबाट भिषा जारी गरिनदिएको गुनासो समेत उनले भिडियो सन्देश मार्फत गरेका छन् ।

पाकिस्तानी परिवारसँग लिएको माफीनामा पत्र अदालतमा बुझाएपछि मात्र उमेशलाई माफी दिएको दाबी रायले गरेका छन् भने यसबारे नेपाली दुतावासले अहिले कुनै प्रतिक्रिया भने दिएका छैनन् । रायले उमेश रिहाको लागि चाहिने कागजात लिन पाकिस्तान जानुपर्ने बताउँदै कम्तीमा पनि ४५ दिन कागजात लिन लाग्ने जनाएका छन् । नेपाल सरकारबाट भिषा पाएलगत्तै कागजात लिन पाकिस्तान जाने उल्लेख गरेका छन् ।

यसअघि करिब डेढ महिनाअघि मात्र उनले एक वा डेढ हप्ता भित्रै उमेश घर आईहाल्ने बताएका थिए । डेढ महिना वितिसक्दा पनि उमेश घर नफर्केपछि कागजातको अभावमा आउन नसकेको उल्लेख गरेका हुन् । उनले ९९ प्रतिशत उमेश घर आउने दाबी समेत गर्दै सबैलाई यसमा सहयोग गर्न अपेक्षा राखेका छन् ।