युवालाई राज्यमन्त्री मण्डलको आग्रह : 'अगाडि आउनुस्, हामी साथमा छौं'

न्यूज ब्यूरो, सिरहा । प्रदेश २ का उद्योग, पर्यटन, वन तथा वातावरण राज्यमन्त्री सुरेश मण्डलले युवा पुस्तालाई खेलकुदमा ध्यान दिन आग्रह गरेका छन् ।

सिरहाको कल्याणपुरमा बिहीबार टी–२० क्रिकेट टुर्नामेन्टको उद्घाटन गर्दै राज्यमन्त्री मण्डलले खेलकुदबाट मधेश र देशको लागि योगदान गर्न आग्रह गरेका हुन् । उनले खेलकुटबाट समाजमा भाईचारा विकसित गराई समृद्ध तथा उन्नत समाजको निर्माण गर्नसमेत मद्दत पुग्ने बताए ।

राज्यमन्त्री मण्डलले खेलकुदले युवालाई शारीरिक रुपले तन्दुरुस्त तथा मानसिक रुपले स्वस्थ बनाउने भएकाले यसमा लाग्न सुझाव दिए । मादक पदार्थ सेवन, धुम्रपान, लागुऔषध जस्ता कुलतमा लागेका युवा पुस्तालाई समाजको मूलाधारामा ल्याउन खेलकूद एउटा राम्रो माध्यम हुने उनले बताए ।

उनले एन्ड्रोइडमा रमाइरहेका युवा पुस्तालाई खेल मैदानमा समय दिन सुझाए । युवा पुस्ताले नै समृद्ध र अधिकार सम्पन्न मधेश तथा देश निर्माण गर्ने भन्दै उनले प्रदेश सरकार सदैव युवाको साथमा रहने प्रतिवद्धता गरे ।