सिरहा : नियमित पठनपाठनको माग गर्दा वडाध्यक्षकै निर्देशनमा कुटिए विद्यार्थी, ५ घाईते !

न्यूज ब्यूरो, सिरहा । नियमित पठनपाठनको नभएको भन्दै विद्यालय र वडा कार्यालयमा तालाबन्दी गरेका सिरहाको एक सामुदायिक विद्यालयका विद्यार्थीहरु वडाध्यक्षकै निर्देशनमा कुटिएका छन् ।

सिरहाको कल्याणपुर नगरपालिका–४ स्थित रहेको श्रीमावि विष्णुपुर डडौलका विद्यार्थीमाथि आईतबार वडाध्यक्षकै निर्देशनमा कुटपिट भएको हो । विद्यार्थीले लगाएको ताला खोल्न गएका वडाध्यक्ष पक्षधरहरुले विद्यार्थी उपर कुटपिट गरेका हुन् ।

विद्यालयको अवस्था जर्जर बनाएको र माग पूरा नहुञ्जेल ताला खोल्न नदिने भन्दै प्रतिकार गरेपछि विद्यार्थीहरुलाई निर्घात कुटपिट गरिएको हो । नियमित पठनपाठनको लागि पटकपटक प्रधानाध्यापक र वडाध्यक्षलाई तोकता गर्दा पनि सुनुवाई नभएपछि बाध्य भएर गत शुक्रबार विद्यार्थीहरुले तालाबन्दी गरेका थिए ।

कसैले नसुने झैँ गरेको भन्दै विद्यालय र वडा कार्यालय समेतमा विद्यार्थीहरुले तालाबन्दी गरेपछि वडाध्यक्षकै निर्देशनमा उनका पक्षधरहरु वडा कार्यालयको ताला खोल्न गएका थिए । तर, विद्यार्थीहरुले अडान कायम राखेपछि विवाद हुँदा वडाध्यक्षको निर्देशनमा गएका उनका मान्छेहरु विद्यार्थी कुटपिटमा उत्रेको एक स्थानीयले न्यूज ब्यूरोसँग भने । कुटपिटबाट ५ जना विद्यार्थीहरु घाईते भएका छन् ।

यता, वडाध्यक्ष दिलिप कुमार यादवले आफ्ना विरोधीहरुले विद्यार्थी उचालेर ताला लगाउन लगाएको प्रतिक्रिया दिए । विद्यार्थी उपर कुटपिट भएको भिडियो समाजिक सञ्जालमा आएपनि उनले कोहीमाथि कुटपिट नभएको दावी गरे ।

यस विषयमा कल्याणपुर नगरपालिकाका मेयर सूर्यनाथ मण्डलसँग प्रतिक्रिया लिन खोज्दा सम्पर्क हुन सकेन ।