जनकपुर यातायात कार्यालयका २ दलाल पक्राउ  !

न्यूज ब्यूरो, जनकपुरधाम । यातायात व्यवस्था कार्यालय जनकपुरबाट लाईसेन्स बनाइदिने भन्दै सेवाग्राहीबाट रकम ठग्ने दुई जना दलाललाई पक्राउ गरिएको छ ।

मोटरसाईकल लाईसेन्सको लागि ट्रायल पास गराइदिने भनेर विभिन्न व्यक्तिसँग रकम असुल गरेपछि सुराकीको आधारमा दुई जना दलाललाई पक्राउ गरिएको हो । यातायात कर्मचारीको मिलोमत्तोमै त्यो रकम उठाइएको बुझिएको छ । यद्यपी उनीहरुलाई पक्राउ गरी अनुसन्धान थालिएको हो । पक्राउ पर्नेमा सर्लाही जिल्लाको मलंगवा नगरपालिका वडा नं. ११ बस्ने अन्दाजी बर्ष ३७ का जितेन्द्र यादव र महोत्तरी जिल्लाको महोत्तरी गाउँपालिका वडा नं. २ बस्ने अन्दाजी बर्ष ३३ का वर्षका पंकज कुमार सिंह रहेको जिल्ला प्रहरी कार्यालय धनुषाका प्रहरी प्रवक्ता एवम् डिएसपी सन्तुलाल जयसवारले जानकारी दिए ।

जयसवारका अनुसार प्रारम्भिक अनुसन्धान तथा उजुरीको आधारमा यी दुवै जनामध्ये जीतेन्द्र यादवले मोटरसाईकल लाइसेन्सको लागि ट्रायल परीक्षामा पास गराइदिने भन्दै धनुषाको सबैला नगरपालिका १० बस्ने अरुणकुमार पंजियार संग ७ हजार रुपैयाँ तथा मिथिला नगरपालिका वडा नं. ६ बस्ने देवेन्द्रप्रसाद यादव संग ५ हजार रुपैयाँ जाली गरेको उजुरीको आधारमा पक्राउ गरिएको हो ।

विभिन्न व्यक्तिको लाईसेन्स बनाउने कागजात सहित नगद समेत बरामद गरी यादव उपर ठगी मुद्दा चलाएको प्रहरी प्रवक्ता जयसवारले जनाउँदै उनले १० जनाको सवारी चालक अनुमति पत्र बनाइदिने भन्दै महोत्तरीको महोत्तरी गाउँपालिका वडा नं. २ बस्ने पंकजकुमार सिंहलाई दिएको १ लाख ५१ हजार रुपैयाँको एनआईसी बैंकको चेक दिएकाले उनलाई पनि पक्राउ गरेर अनुसन्धान गरिरहेको थपे ।

जनकपुरधाम उपमहानगरपालिका वडा नं. ८ ज्ञानकुप विद्यालय प्राँगनमा बनाइएको सवारी ट्रायस स्थलमा यातायात कर्मचारी, प्रहरी सहित अन्य सम्बन्धित निकायका व्यक्तिहरुको उपस्थितिमा सिसिटिभी क्यामेरामा लाइभ गरी ट्रायल दिइन्छ । यातायात कार्यालय भित्रै केही कर्मचारीहरुले पहुँच र दलालको आधारमा कार्य गर्ने गरेको गुनासो आम सेवाग्राहीको छ ।

पहुँचबाला र दलालको भरमा केही क्षणमै काम हुन्छ भने पहुँच नभएको र प्रक्रिया अनुसार जाँदा झयालमा घण्टौसम्म बस्नुपर्ने बाध्यता रहेको नाम नखोल्ने शर्तमा एक सेवाग्राहीले बताए । "कर्मचारीहरु गफमा व्यस्त हुन्छन, भित्रैको ढोकाबाट छिरेर पहुँचबालाहरुले रसिद कटाउँछन, बाँकी सेवाग्राही यत्रो चर्को घाममा झयालमा झुण्डिएर लाईन बस्नुपर्ने वाध्यता छ । दलालहरुलाई भित्रैबाट काम हुन्छ भने घण्टौसम्म लाईनमा बस्दा बाहिरबाट काम गराउन त्यति सजिलो छैन ।"- उनले भने ।