प्रसिद्ध उत्तरवाहिनी मेला : पार्किंगको नाममा युवा क्लबको मनोमानी असुली

न्यूज ब्यूरो, सिरहा । सिरहा र धनुषा सीमामा पर्ने कमला नदीको प्रसिद्ध तथा पौराणिक उत्तरवाहिनी मेलामा सवारी पार्किंगको नाममा साउनको सोमबारी मेलामा मेलाभर्न आउने भक्तजनहरुसँग स्थानीय युवाहरुले मनोमानी रकम असुल्ने गरेको पाइएको छ ।

मेला भर्न आउने भक्तजनहरुले ल्याएको मोटरसाईकल लगायतका विभिन्न सवारी साधनको पार्किंगको नाममा स्थानीय उत्तरवाहिनी युवा क्लब सम्बद्ध युवाहरुले रकम असुलिरहेको पाइएको हो । एउटा मोटरसाईकलको २० रुपैयाको रसिद काट्ने गरिएपनि बाहिरका श्रद्धालुहरुसँग मनोमानी तरिकाले मनलाग्दी रकम असुलिरहेका छन् ।

युवा क्लबले आफ्नै नाउँमा छापेको पार्किंग रसिद काटेर अवैध रुपमा रकम असुल गर्ने गरेको भएपनि मेला समिति र स्थानीय प्रशासन भने चुईक्क बोलेको छैन । सबारी पार्किंगको नाममा अवैध असुलीका कारण मेला भर्न आउने श्रद्धालुहरु मार खेप्न बाध्य भएका छन् ।

मेलामा स्वयंसेवकको भूमिका निर्वाह गर्नुपर्ने सामाजिक संस्थाको रुपमा रहेको युवा क्लबको यस कार्यले मेला भर्न आउने भक्तजनहरुमा उत्तरवाहिनीप्रति नकारात्मक भाव पैदा गरेको देखिन्छ । । यस किसिमको अवैध असुलीले दुखित बनाएको भक्तजनहरुको गुनासो छ । जल भर्न तथा दर्शनका लागि भारत बिहारको बेनिपट्टीबाट आएका रामेश्वर कामतीले भने, ‘बाहिर–बाहिरका श्रद्धालुहरुसँग एउटा टाटा सुमोको पाँच सय रुपैयासम्म असुल्ने गरिएको छ, यस्तो हेर्दा हामीलाई दुःख लागेको छ, हामी टाढाबाट आएका हौं, पाहुना हौं, तर हामीसँग ठगी गरेको देखेर दुखित बनाएको छ ।’

स्थानीय निकायसँग बिना कुनै जानकारी नै पार्किंगको नाउँमा अवैध रकम उठाइरहेको छ भने नियामक निकाय पनि चाँसो देखाएका छैनन् । नदी किनारको खुला क्षेत्रमा पनि पार्किंगको नाउँ रकम उठाउनुले उत्तरवाहिनी मेलाको व्यवस्थापन माथि नै प्रश्न उठाएको छ ।

साउन महिनाको आईतबार साँझदेखि नै उत्तरवाहिनीमा ठुलो मेला लाग्ने गरेको छ । कमला नदीमा जल भरेर सिरहाको सारस्वरनाथ, टुटेश्वरनाथ, नाभेश्वरनाथ, कल्याणेश्वरनाथ लगायतका शिवालयहरुमा जल चढाउने भक्तजनहरुको भारी भीड लाग्ने गरेको छ ।

प्रसिद्ध धार्मिक आस्थाको केन्द्र मानिने उत्तरवाहिनीमा जल भर्न सिरहा लगायत धनुषा, महोत्तरी, सिन्धुली, रामेछाप र भारत बिहार क्षेत्रका श्रद्धालुहरुको ठूलै संख्या उत्तरवाहिनी आएर जल भर्ने गरेका छन् ।