फोरम प्रदेश नं. २ को अध्यक्षमा अर्थमन्त्री यादव विजयी

न्यूज ब्यूरो, जनकपुरधाम । संघीय समाजवादी फोरमको प्रदेश नं. २ को अध्यक्षमा प्रदेश नं. २ का आर्थिक मामिला तथा योजना मन्त्री विजय कुमार यादव निर्वाचित भएका छन् ।

सोमबार अबेर राती सम्पन्न अधिबेशनको क्रममा भएको मतदानबाट मन्त्री यादवले १ सय ८४ मत ल्याएर विजयी भएका हुन् । उनका निकटम प्रतिद्धन्द्धी रेणु यादवले १ सय ४७ मत ल्याएर पराजय भएकी हुन् । समगोलमा अर्थमन्त्री यादव ३७ मतले विजयी भएका हुन् ।

सिरहाको लहानमा सम्पन्न भएको मतदानबाट अबेर राती विजय यादवलाई प्रदेश नं. २ को लागि अध्यक्ष पदमा निर्वाचित घोषित गरिएको थियो । सत्तारुढ संघिय समाजवादी फोरम नेपालको प्रदेश २ अध्यक्षका लागि तीन जना प्रतिष्पर्धामा उत्रेका थिए ।

शनिवार अबेर राती सार्वजनिक गरिएको अन्तिम नामावली अनुसार अध्यक्ष पदमा रेणु यादव, विजय कुमार यादव र अशोक यादवले उम्मेदवारी कायम राखेका थिए ।

प्रदेश २ मा सशक्त संगठन र निर्वाचनमा भारी सफलता प्राप्त गरेको उपलब्धि रेणु यादवको मानिन्छ भने विजय यादवले पार्टीको केन्द्रिय कार्यालयका लागि जग्गा खरिददेखि भवन निर्माण सम्मको कार्य गर्नुका साथै पार्टीमा आर्थिक अनुशासन कायम राख्न सफल रहेको चर्चा चुनाव अघिदेखि नै चलेको थियो ।

दुवै उम्मेदवार सशक्त देखिएपछि मतदाता नेताहरु सहमति हुनुपर्नेमा जोड दिन थालेका थिए । रेणु यादव वर्तमान प्रदेश अध्यक्ष र केन्द्रिय उपाध्यक्ष हुन् । विजयकुमार यादव प्रदेशको आर्थिक मामिला तथा योजना मन्त्री र पार्टीका केन्द्रिय कोषाध्यक्ष पनि हुन् । अशोक यादव सर्लाहीबाट प्रदेश साँसद हुन् ।

नयाँ विधान अनुसार प्रदेशको ५१ सदस्यीय समिति मध्ये ४१ जनाका लागि निर्वाचन भएको थियो ।निर्वाचन समितिका अनुसार २ सय जनाले प्रदेश सदस्यमा उम्मेदवारी दर्ता गराएका थिए । विजयी सदस्यहरुको नामाबली तथा अन्य पदाधिकारीको नामाबली आउन बाँकी छ ।

अध्यक्ष र सदस्यको निर्वाचन भएपछि समितिले १० जना मनोनित गर्ने समेतबाट तीन जना उपाध्यक्ष , एकजना महासचिव, एक जना सचिव र एक जना कोषाध्यक्ष चयन गरिनेछ ।पार्टी विधानले एक व्यक्ति एक पदको व्यवस्था गरेको छ । प्रदेशमा रहने नेताहरु केन्द्रिय समितिमा जान नपाउने प्रदेश मुख्य सचिव शम्भु झाले जनाए ।

प्रदेश समितिको निर्वाचनमा ४ सय ५ जना मतदाता रहेका छन् ।आईतवार बिहान ८ बजेदेखि मतदान सुरु भएको थियो ।