म्यानमारको जेलमा कैद सिरहाका लट्ठुरामलाई नेपाल ल्याउन कसले थाल्यो पहल ?

न्यूज ब्यूरो, सिरहा । म्यानमारको जेलमा विगत डेढ वर्षदेखि जेली जीवन बिताइरहेका सिरहाका लट्ठु भन्ने रामप्रसाद मोचीलाई स्वदेश फर्काउने पहल थालिएको छ ।

सिरहाको लक्ष्मीपुर पतारी गाउँपालिका १ का लट्ठुराम डेढ वर्षअघि भारतीय नाकाबाट बिना पासपोर्ट म्यानमार पुगेपछि उनी पक्राउ परेका थिए । पक्राउ परेदेखि उनी जेलमा कैद छन् । म्यानमारका राष्ट्रपतिले कैद माफीको घोषणा गरेपछि उनीसँग पहिचान खुल्ने कुनै कागजात नभएका कारण जेलमुक्त हुन पाएका छैन ।

पहिचान खुल्ने कागजात नभएर जेलमुक्त हुन नसकेका मोचीलाई स्वदेश फर्काउने प्रयास दीप फाउन्डेशनले थालेको छ । शुक्रवार विहान फाउन्डेशनका कार्यकारी निर्देशक जितेश कर्णले मोचीको घर पुगेका उनका आफन्तसँग आवश्यक कागजात लिएका छन् ।

मोचीको परिचय खुल्ने कागजात म्यानमारमा फोन मार्फत कुरा गरेर निर्देशक कर्णले पठाइसकेका छन् । कागजात त्यहाँका अधिकारीले पाएपछि मोची जेलमुक्त हुने अपेक्षा गरिएको छ ।