दहेजको विकराल रुप : धनुषाकी एक युवति उपर मट्टितेल छर्केर श्रीमानले लगाए आगो !

न्यूज ब्यूरो, जनकपुरधाम । धनुषामा दहेज (दाईजो) नै नदिएको रिसमा आफ्नै श्रीमतिलाई उनका श्रीमानले जीउमा आगो लगाएर जलाइदिएका छन् ।

धनुषाको शहिदनगर नगरपालिका वडा नं. १ बडका चिरैया (ठुलो चिरैया) भन्ने टोलमा स्थानीय झरी गोईतका २३ बर्षिय छोरा मुकेश कुमार गोईत (यादव) ले आफ्नै श्रीमति वर्ष २१ की निर्मला देवी गोईत(यादव) लाई जीउमा आगो लगाएर जलाइदिएका छन् ।

गत बैशाख ५ गते दिउँसै मुकेशले आफ्नी श्रीमति निर्मलालाई जीउमा मट्टितेल छर्केर आगो लगाएका थिए । निर्मलालाई कोठा बन्द गरी जीउमा मट्टितेल छर्केर सलाई बालिदिए, निर्मला चिच्याउँदै रहिन र मुकेश भागे । निर्मलालाई उनका छिमेकीहरुले चिच्याएको आवाज सुनेपछि ढोका फोडेर तत्कालै आगो निभाए तर त्यतिबेलासम्म ढिलो भईसकेको थियो । निर्मलाको छाती र पेटसम्म करिब ३५ प्रतिशत भाग जलेको जिल्ला प्रहरी कार्यालय धनुषाका प्रहरी प्रवक्ता रामेश्वर कार्कीले जनाए ।

"निर्मला र मुकेशको विहेको १० महिना मात्र भएको थियो । दाईजोले पिरोलिएका निर्मलाका परिवारलाई दाइजो दिन पनि थप तनाव नै थियो । शायद मुकेशको केही माग थियो दाईजोको रुपमा ससुरालीबाट, उनीहरुलाई समय लगाएको कारण जलाएको हुनुपर्ने अनुमान गरिएको छ ।"- ईलाका प्रहरी कार्यालय सबैलाका प्रहरी नीरिक्षक चन्द्रभुषण यादवले भने ।

धनुषाकै कमला नगरपालिका वडा नं. ५ लक्कड टोल बस्ने निर्मलालाई मुकेशसँग ४ लाख रुपैयाँ बढी दाईजो दिएर धुमधामका साथ विहे गरिएको थियो । "नशालु र जड्याहा स्वभावको मुकेशले निर्मलासँग समान्य झगडाको निहुँ खोज्दै मट्टितेल छर्केर आगो लगाइदिए ।"- उनको परिवारजनको कथन छ ।

निर्मलाको उपचारको लागि छिमेकीको सहयोगमा तत्कालै जनकपुर अञ्चल अस्पताल ल्याइएको थियो भने घाईतेको प्रकृति हेर्दा उनलाई काठमान्डौ रिफर गरिएको थियो । निर्मलाको उपचार अहिले शिक्षण अस्पताल महाराजगँज काठमान्डौँमा भईरहेको ईलाका प्रहरी कार्यालय सबैलाका प्रहरी नीरिक्षक यादवले जानकारी दिए । उनका अनुसार आगो लगाएर फरार भएका मुकेशको खोजी कार्य तीव्र पारिएको छ ।

निर्मलाको स्वास्थ्य अवस्था अहिले गम्भिर रहेको उनका परिवारजनलाई उदृत गर्दै प्रहरीले जानकारी दिएको छ । अस्पतालमा उपचारमा संलग्न चिकित्सक डा. सुरेन्द्रजंग बस्नेतले निर्मलाको ३५ प्रतिशत बढी शरीर जलेको बताए । ४० प्रतिशतभन्दा बढी जलेको मानिसलाई बचाउन नसकिने उल्लेख गर्दै उनले निर्मलाको अवस्थामा पनि एक हप्तासम्म केही भन्न नसकिने जानकारी दिए ।

निर्मलाको जलेका भागको मासु झिकेर छाला प्रत्यारोपण गर्छ । ‘यो ढिलो गर्‍यो भने मासु कुहिएर संक्रमण फैलने डर हुन्छ । विस्तारै मुटु, मिर्गौला, छातीमा हान्न सक्छ’, डा. बस्नेतले भन्छन्, ‘तर, छाला परिवर्तन गर्न परिवारले अनुमति दिइसक्नु भएको छैन ।’

निर्मलाको परिवारजनको तर्फबाट सर्जरी (छाला प्रत्यारोपण) को लागि अनुमति भएसँगै उनको सर्जरी गरिने जनाइएको छ । यसबारे शहिदनगर नगरपालिकाका मेयर उदय कुमार बरबरियासँग सम्पर्क गर्दा आफूलाई केही जानकारी नभएको प्रतिक्रिय दिए भने कमला नगरपालिकाका मेयर राम उदगार गोईतसँग सम्पर्क हुन सकेनन् ।