'भिख चाहिदैन, न्याय चाहियो' : रेशम चौधरी

न्यूज ब्यूरो, जनकपुरधाम । निर्वाचित भएको झण्डै १३ महिनापछि सपथ लिन पाएका राजपा सांसद रेशम चौधरीले टीकापुर घटनाका दोषीलाई कारवाही हुनुपर्ने बताएका छन् । सांसद चौधरीले आफूमाथि मात्र राजनीतिक मुद्दा लादिएको र आफू निर्दोष रहेको भन्दै अदालतले आफूलाई न्याय दिनेमा विश्वस्त रहेको बताएका हुन् ।

उनले टीकापुर घटना, सामाजिक सञ्जालमा जिस्काउने घटना नभई वर्गीय, जातीय भावनालाई ठेस पुगेको घटना भएको भन्दै त्यस क्रममा जेलमा रहेकाहरुमाथि स्पष्ट छानबिन गरी राज्यले सबैलाई न्याय दिनुपर्ने धारणा राखे ।

राजपाले सरकारलाई दिइएको समर्थन फिर्ता लिने अल्टिमेटम दिएपछि अन्ततः उनलाई आज (बिहिवार) सिंहदरबारमा सपथ ग्रहण गराइएको हो ।

उनलाई कडा सुरक्षाबीच सिंहदरबारमा ल्याइएको थियो भने सपथ ग्रहण पश्चात् पुनः कारागारमै पठाइएको छ ।

गत २०७४ मा भएको प्रतिनिधिसभा सदस्यको दोश्रो चरणको निर्वाचनमा उनी फरार रहेकै अवस्थामा कैलाली क्षेत्र नम्बर १ बाट बाम गठबन्धनकी उम्मेदवार गरिमा शाहलाई भारी मतान्तरले पराजित गरी निर्वाचित भएका थिए ।