कमलदहमा यसपाली सबैभन्दा भव्य ‘ठुठिया मेला’

न्यूज ब्यूरो, सिरहा । पौराणिक महत्व बाकेको धार्मिक आस्थाको केन्द्र सिरहाको कमलदहमा लाग्दै आएको ऐतिहासिक “ठुठिया मेला” विगतका वर्षको तुलनामा यसपाली सबैभन्दा भव्य तरिकाले आयोजन गरिएको छ । प्रत्येक वर्ष हरिबोधिनी एकादशीको अवसरमा तीनदिनसम्म विगत करिब ४ दशकदेखि निरन्तर सिरहाको मिर्चैया नगरपालिका वडा नं. ९ कमलदहमा आयोजन हुँदै आएको ऐतिहासिक ठुठिया मेला यसपाली सबैभन्दा भव्य तरिकाले आयोजन गरिएको हो ।

धार्मिक, ऐतिहासिक तथा पौराणिक महत्व बोकेको कमलदहमा लामो समयदेखि आयोजना गरिदै आएको ठुठिया मेलामा यसपाली विभिन्न प्रकारका मनोरञ्जनात्मक कार्यक्रमहरुको आयोजना गरिएको मेला समितिका अध्यक्ष रामबिलेक्षण यादवले जानकारी दिए ।

अन्य वर्षको तुलनामा यसवर्ष मेलाको लागि उचित व्यवस्थापन, प्रयाप्त ठाउँ, मनोरञ्जनात्म कार्यक्रम, कुस्ती, रामझुलासहित सांस्कृतिक जगेर्ना कार्यक्रमको आयोजना गरिएको छ । मेला मंसिर ३ गत्ते सोमबारदेखि ५ गत्ते बुधबारसम्म लाग्नेछ ।

मेलामा नेपाल र मित्र राष्ट्र भारतका प्रख्यात पहलवानहरु आउँदैछन् । ३ देखि ५ गत्तेसम्म रहने सो मेलामा तीनैदिन नामी पहलवानहरुबीच जोडदार भिडन्त (कुस्ती) हुनेछ । मेलाभर दिन र रातमा समेत संस्कृति जगेर्नात्मक कार्यक्रम रहने आयोजकले जनाएको छ ।

कमलदहमा हरिबोधिनी एकादशीका दिन नेपालका विभिन्न ठाउँहरुबाट लाखौंको संख्यामा युवा–युवती तथा सर्वसाधारण व्रतालुहरु आउने गर्दछन् । पौराणिक एवं धार्मिक महत्व बोकेको कमल फूलको नामले परिचित यस कमलदहमा स्नान गरेर पूजापाठ गरे मनोकांक्षा पूरा हुने मूख्य धार्मिक जनविश्वास रहिआएको छ ।

मेला भर्नको लागि विभिन्न छिमेकी ठाउँहरुबाट भारी संख्यामा सर्वसाधारणहरु आउने गर्छन् । मेलामा अत्यधिक भीड हुने भएकाले मेला व्यवस्थापन, शान्ति सुरक्षा, बाटो सडक मर्मत, खानेपानी व्यस्थापनलगायतका आवश्यक सबै तयारी पूरा गरिएको आजोजक समितिले जनाएको छ ।