जानकी मन्दिरको प्रचार प्रसार आवश्यकः मुख्यमन्त्री राउत

न्यूज ब्यूरो, जनकपुरधाम । प्रदेश २ का मुख्यमन्त्री मो. लालबाबु राउत गद्दीले देश र प्रदेशको शान जानकी मन्दिरलाई विश्वसामु चिनाउन आवश्यक रहेको बताएका छन् । विश्वका हिन्दु धर्मावलम्बीहरुको आस्थाको केन्द्र तथा धरोहर जनकपुरधामलाई विश्वसामु चिनाउन आवश्यक रहकको बताउँदै जानकी मन्दिरको प्रचार प्रसारमा व्यापकता ल्याउन जरुरी भएको बताएका हुन् ।

शनिबार जनकपुर स्थित सिताराम विवाह मणि मण्डप विकास समितिले आयोजना गरेको शुभकामना आदान प्रदान कार्यक्रमलाई सम्बोधन गर्दै मुख्यमन्त्री राउतले हिन्दु धर्मावलम्बीहरुको केन्द्र जानकी मन्दिर, मणिमण्डप, धनुषाधाम जस्ता ऐतिहासिक तथा धार्मिक महत्वका स्थानहरुको प्रचार प्रसार तथा विकास मात्र गर्न सकिए देश र प्रदेश समृछिको ढोका खुल्ने बताएका हुन् । उनले भने, ‘जानकी मन्दिर यति विख्यात छ की यसको प्रचार प्रसार गर्न सकिए वर्षेनी लाखौं पर्यटकीय जनकपुरधाममा आउने र पर्यटनबाटै यहाँको विकास र समृद्धिको ढोका खुल्नेछ ।’

मुख्यमन्त्री राउतले केन्द्र सरकारसंग आन्तरिक हवाईजहाज उडानको लागि संस्कृति पर्यटन तथा नागरिक उड्डयनमन्त्री रविन्द्र अधिकारीसंग जनकपुरधाम–पोखरा–काठमाण्डौ हवाईअड्डाविस्तार तथा उडानको लागि पहल भईरहेको जानकारी दिए । उनले जनकपुरधाम राज्यको प्राथमिकतामा कहिल्यै पर्न नसकेको कारण पछाडि परेको आरोप लगाउँदै उनले भने, जनकपुरधाम दर्शनले मात्र मोक्ष पाउने यस्तो पवित्र ठाउँमा को आउँन चाहदैनन, तर यहाँ त सरकारकै विभेदको भुमरिमा परेको कारण यो क्षेत्र पछाडि परेको छ ।’

उनले नेपाल मात्र नभई भारत तथा अन्य मुलुकहरुमा समेत हिन्दु धर्मका अनुयायीहरुको कुनै कमी नभएको तथा यस पवित्र स्थललाई पर्यटनसंग जोड्न सकिए विकास मुहान फुटने दाबी गरे । उनले प्रदेश सरकारले जानकी मन्दिरको विकासका लागि झण्डै ८ करोडको बजेटको व्यवस्था समेत गरेको बताउँदै अबको केही दिनमा नै जानकी मन्दिरको सौन्दर्यीकरण सुरु हुने दाबी गरे ।