चोहर्वामा सार्वजनिक शौचालय नहुँदा सर्वसाधारण बाहिरै शौच गर्न बाध्य

न्यूज ब्यूरो, सिरहा । सिरहाको नरहा गाउँपालिका अन्तर्गत नयाँ चोक चोहर्वामा सार्वजनिक शौचालय नहँुदा सर्वसाधारण बाहिरै शौच गर्न बाध्य भएका छन् । हरेक समय सर्वसाधारणको घुइँचो रहने ठाउँमा स्थानीय तहले सार्वजनिक शौचालयको प्रबन्ध नगरिदिँदा सर्वसाधारण खुल्ला ठाउँमै शौच गर्न बाध्य भएका हुन् ।

विभिन्न ठाउँहरुबाट चोहर्वा आउने सर्वसाधारण सार्वजनिक शौचालय नदेखेपछि खुल्ला ठाउँहरुमा नै दिशा पिसाब गरिरहेको देखिन्छन् । सार्बजनिक शौचालयको प्रबन्ध नहुँदा जताततै दिसा र पिसावले गर्दा दुर्गन्ध फैलिएको छ ।

फरकफरक ठाउँहरुबाट चोहर्वा आउने व्यापारी, सर्वसाधारण तथा स्थानीयबासीहरुले सार्वजनिक शौचालय नभेटेपछि दिशापिसाब चेपेर पनि बस्नु परेको गुनासो पोख्छन् ।

कुनै काम बिशेषले चोहर्वा आउँदा शौच गर्नको लागि सौचालयको व्यवस्था नहुँदा सर्वसाधारणलाई निकै असहज हुने गरेको छ ।