उत्तरवाहीणीबाट कमला नदीले बगाएका थप २ को शव फेला

न्यूज ब्यूरो |

सिरहा, ११ भदौ । कमला नदीले गएको शनिबार बगाएका दुई किशोरको शव सोमबार भेटिएको छ । साउने पूर्णिको जल भर्न सिरहाको बन्दिपुर १ कमला नदीको उत्तरवाहीणीबाट शनिबार बाढीले बगाएको गोलबजार ४ निपनीयँका १५ वर्षका मन्जय महरा र राहुल राउतको शव फेला परेको हो ।

महराको शव भारतीय सीमाक्षेत्रका बजार जयनगर नजिक कमला नदीको पुलमूनि फेला परेको छ भने राउतको शव कर्जन्हा ७ स्थित कमला नदी किनारमा फेला परेको जिल्ला प्रहरी कार्यालय सिरहाका प्रवक्ता तथा डीएसपी माधवराज खरेल जानकारी दिनुभयो ।

दुवैको शव पोस्टमार्टमका लागि जिल्ला अस्पताल सिरहा ल्याइएको छ । कमला नदीले शनिबार ३ जनालाई बगाएको थियो । जसमध्ये सिरहाको औरही गाउँपालिका–३, तुलसिपुरका २० वर्षका कृष्ण महतोको शव आइतबार धनुषा क्षेत्रको कमला नदी किनारमा भेटिएको थियो ।