जन्माष्टमीको राति मन्दिर जाँदै गरेकी १४ वर्षीया किशोरीमाथि दुष्कर्मको आरोप, मो. समिरसहित तीन पक्राउ

एजेन्सी। भारतको उत्तर प्रदेशस्थित मुजफ्फरनगरमा जन्माष्टमीको राति मन्दिर जाँदै गरेकी १४ वर्षीया किशोरीलाई अपहरण गरी दुष्कर्म गरेको आरोपमा तीन युवक पक्राउ परेका छन् । 

घटनामा सुरुमा मुख्य आरोपी समीरलाई पक्राउ गरिएको थियो भने फरार रहेका वलीन र सलमानलाई समेत प्रहरीले मुठभेडपछि पक्राउ गरेको भारतीय सञ्चारमाध्यमले जनाएका छन् । 

घटना छपार थाना क्षेत्रको एक गाउँमा गत सेप्टेम्बर ४ को राति भएको बताइएको छ । प्रहरीमा परेको उजुरीअनुसार किशोरी जन्माष्टमीको अवसरमा मन्दिर जान घरबाट निस्किएकी थिइन् । सोही क्रममा गाउँकै समीरले आफ्ना दुई साथी वलीन र सलमानसँग मिलेर उनलाई जबर्जस्ती नियन्त्रणमा लिएको आरोप छ । त्यसपछि उनलाई समीरको घरको एउटा कोठामा लगिएको र त्यहाँ दुष्कर्म गरिएको आरोप पीडित पक्षले लगाएको छ । 

किशोरी लामो समयसम्म घर नफर्किएपछि परिवारले खोजी सुरु गरेको थियो । खोजीका क्रममा उनलाई कथित रूपमा समीरको घरबाट असहज अवस्थामा फेला पारिएको भारतीय सञ्चारमाध्यमले जनाएका छन् । त्यसपछि परिवारले छपार प्रहरीमा उजुरी दिएपछि प्रहरीले गम्भीर धाराअन्तर्गत मुद्दा दर्ता गरेको थियो । 

प्रहरीले घटनाको मुख्य आरोपी भनिएका समीरलाई पक्राउ गरी अनुसन्धान अघि बढाएको थियो । फरार रहेका वलीन र सलमानलाई सेप्टेम्बर ६ मा रेटा नंगला गाउँको जंगल क्षेत्रमा खोजी गर्ने क्रममा प्रहरीले फेला पारेको बताइएको छ । 

प्रहरीका अनुसार उनीहरूले प्रहरी टोलीमाथि गोली चलाएपछि जवाफी कारबाही गरिएको थियो । त्यस क्रममा दुवै जना घाइते भए र पक्राउ परेका हुन् । उनीहरूबाट दुई थान अवैध .३१५ बोरका कट्टा तथा गोली बरामद भएको प्रहरीको दाबी छ ।

यससँगै घटनामा संलग्न भनिएका तीनै जना पक्राउ परिसकेका छन् । प्रहरीले घटनाको थप अनुसन्धान गरिरहेको जनाएको छ ।

घटना सार्वजनिक भएपछि स्थानीय स्तरमा समेत आक्रोश देखिएको भारतीय सञ्चारमाध्यमले उल्लेख गरेका छन् । योग साधना आश्रमका महन्त स्वामी यशवीर जी महाराजले आरोपीमाथि कडा कारबाही गर्न उत्तर प्रदेशका मुख्यमन्त्री योगी आदित्यनाथसँग माग गरेका छन् । साथै उत्तर प्रदेश सरकारका मन्त्री कपिल देव अग्रवालले पीडित परिवारलाई भेटेर घटनामा कडा कारबाहीको आश्वासन दिएका थिए ।