धादिङमा त्रिशूली नदीको जलसतह खतराको तहभन्दा ३ मिटर माथि, सतर्क रहन अपिल

न्यूज ब्यूरो, काठमाडौं । पछिल्लो समय भइरहेको भारी वर्षाका कारण देशका विभिन्न नदीमा जलसतह बढेर खतरा र सतर्कताको तह पार गर्न थालेको छ ।

बाढी पूर्वानुमान महाशाखाका अनुसार धादिङस्थित त्रिशूली नदीमा जलसतह खतराको तहभन्दा करिब ३ मिटर माथि पुगेको छ ।

रसुवाको भोटेकोशी क्षेत्रमा आएको बाढीका कारण त्रिशूली नदीमा जलसतह बढेको महाशाखाले जनाएको छ । यस्तै, गण्डकी प्रदेशका विभिन्न जलाधार क्षेत्रमा भारी वर्षा भएकाले नारायणी नदी तथा यसका सहायक नदीहरूमा समेत जलसतह बढ्ने सम्भावना रहेको जनाइएको छ ।

महाशाखाले नारायणी तथा यसका सहायक नदीको तटीय क्षेत्रमा रहेका बासिन्दालाई विशेष सतर्कता अपनाउन आग्रह गरेको छ ।

यसैगरी, सिन्धुलीको खुर्कोटस्थित सुनकोशी नदी जलमापन केन्द्रमा समेत जलसतहले सतर्कताको तह पार गरेको छ । नदी तटीय क्षेत्रमा रहेका बासिन्दालाई सतर्क रहन महाशाखाले अनुरोध गरेको छ ।

पछिल्लो २४ घण्टामा सिन्धुपाल्चोकमा अत्यधिक भारी वर्षा मापन भएको थियो । सोही कारण सिन्धुपाल्चोकभन्दा तलतर्फ रहेका नदी तथा खोलाहरूमा जलसतह बढेको महाशाखाले जनाएको छ ।

महाशाखाले नदी आसपासका क्षेत्रमा बसोबास गर्ने नागरिकलाई नदीको बहाव बढ्ने सम्भावनालाई ध्यानमा राख्दै आवश्यक सावधानी अपनाउन आग्रह गरेको छ ।