किसानदेखि आम उपभोक्तासम्मका समस्या उठाउँदै धनुषामा नेकपाको ज्ञापनपत्र

नेपाली कम्युनिष्ट पार्टी जिल्ला कमिटी धनुषाले जिल्लामा आम नागरिक तथा किसानले भोग्दै आएका जनजीविकासँग सम्बन्धित समस्या तत्काल समाधान गर्न माग गर्दै जिल्ला प्रशासन कार्यालय धनुषामार्फत सरकारको ध्यानाकर्षण गराएको छ।

जिल्ला कमिटीले प्रमुख जिल्ला अधिकारीसमक्ष बुझाएको ज्ञापनपत्रमा विशेषगरी किसानका लागि आवश्यक मलखाद तथा गुणस्तरीय बीउबिजनको अभाव, खाना पकाउने एलपी ग्यासको सहज आपूर्ति तथा दैनिक उपभोग्य वस्तुको मूल्यवृद्धिले सर्वसाधारण प्रभावित भएको उल्लेख गरिएको छ।

ज्ञापनपत्रमा किसानलाई आवश्यक पर्ने मलखाद पर्याप्त मात्रामा तत्काल उपलब्ध गराउन, गुणस्तरीय बीउबिजन समयमै उचित मूल्यमा उपलब्ध गराउने व्यवस्था मिलाउन माग गरिएको छ। त्यस्तै मलखाद तथा बीउबिजनमा हुने कालोबजारी, कृत्रिम अभाव र अनियमित मूल्यवृद्धि नियन्त्रण गर्न तत्काल प्रभावकारी कदम चाल्न प्रशासनसँग आग्रह गरिएको छ।

पार्टीले सर्वसाधारणका लागि आवश्यक खाना पकाउने एलपी ग्यासको नियमित तथा सहज आपूर्ति सुनिश्चित गर्न र ग्यासमा हुने कालोबजारी नियन्त्रण गर्नसमेत माग गरेको छ। साथै, ग्यास, खाद्यान्न तथा दैनिक उपभोग्य वस्तुको कृत्रिम अभाव र कालोबजारी नियन्त्रण गरी उचित मूल्य कायम गर्न प्रशासनको ध्यानाकर्षण गराइएको छ।

ज्ञापनपत्रमार्फत शान्ति सुरक्षाको अवस्था सुधार गर्न तथा अमानवीय व्यवहारलगायतका घटनामा संलग्न दोषीमाथि आवश्यक छानबिन गरी कडा कारबाही गर्न माग गरिएको छ। यस्ता समस्या तत्काल समाधानका लागि जिल्ला प्रशासन कार्यालयमार्फत सम्बन्धित सरकारी निकायबीच आवश्यक समन्वय गरी प्रभावकारी कदम चाल्न पार्टीले आग्रह गरेको छ।

ज्ञापनपत्रमा आम जनता, किसान तथा मजदुर वर्गका जनजीविकासँग प्रत्यक्ष जोडिएका समस्यालाई गम्भीरतापूर्वक लिएर तत्काल पहल गर्नुपर्नेमा जोड दिइएको छ।

नेपाली कम्युनिष्ट पार्टी जिल्ला कमिटी धनुषाले जनताको दैनिक जीवनसँग जोडिएका समस्या समाधान नभए त्यसको प्रत्यक्ष असर किसान, मजदुर तथा सर्वसाधारण नागरिकमा पर्ने भन्दै सम्बन्धित निकायलाई तत्काल आवश्यक कदम चाल्न आग्रह गरेको जनाएको छ।